ធុរកិច្ចថ្មី និងសហគ្រាសធុនតូចនិងមធ្យមចំនួន ៣៨ ទទួលបានកញ្ចប់ជំនួយហិរញ្ញប្បទានសហគ្រិនខ្មែរ ដើម្បីស្តារលំនឹង និងពង្រីកអាជីវកម្ម
សហគ្រិនខ្មែរ បានរៀបចំពិធីប្រគល់កញ្ចប់ជំនួយហិរញ្ញប្បទានដល់ធុរកិច្ចថ្មី និងសហគ្រាសធុនតូច និងមធ្យមចំនួន៣៨ នៅថ្ងៃទី០៥ ខែមេសា ឆ្នាំ២០២៤ ក្នុងគោលដៅផ្តល់លទ្ធភាពដល់សហគ្រាសទាំងនេះ ក្នុងការស្ដារលំនឹងអាជីវកម្ម ពង្រឹងប្រតិបត្ដិការ និងបង្កើនសក្ដានុពលនាំចេញ។ កម្មវិធីនេះបានប្រព្រឹត្ដទៅក្រោមអធិបតីភាពរបស់ ឯកឧត្ដម ហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជាប្រធានក្រុមប្រឹក្សាបរធនបាលនៃសហគ្រិនខ្មែរ។
ឯកឧត្ដម ហែម វណ្ណឌី បានលើកឡើងថា៖ «សហគ្រិនខ្មែរ បានកសាងសមិទ្ធផលជោគជ័យមួយចំនួន ហើយនឹងបន្តបេសកកម្មរបស់ខ្លួន ដើម្បីពង្រឹងប្រព័ន្ធអេកូឡូស៊ីសហគ្រិនភាព ដោយផ្តោតជាពិសេសលើការថែបំប៉នធុរកិច្ចថ្មី និងសហគ្រាសធុនតូចនិងមធ្យម ក្នុងវិស័យអាទិភាពរបស់រាជរដ្ឋាភិបាល។ តាមរយៈការផ្តល់ជំនួយបច្ចេកទេស និងយន្តការផ្តល់ហិរញ្ញប្បទានដ៏រឹងមាំ សហគ្រិនខ្មែរ បាន និងកំពុងផ្តល់ភាពអង់អាចដល់សហគ្រាសក្នុងស្រុក ដោយលើកកម្ពស់ភាពប្រកួតប្រជែង និងពង្រីកទីផ្សារ ដើម្បីឱ្យសហគ្រាសទាំងនោះរួមចំណែកកាន់តែច្រើនដល់ការបង្កើតការងារ និងកំណើនសេដ្ឋកិច្ចរបស់កម្ពុជា។»
ដូចក្នុងបណ្តាជាច្រើនលើសាកលលោក សហគ្រាសធុនតូច និងមធ្យមនៅកម្ពុជា គឺឆ្នឹងខ្នងនៃសេដ្ឋកិច្ច ជាតិដែលបានផ្តល់ការងារប្រមាណ ៧០ភាគរយ និងបានរួមចំណែកប្រមាណ ៥៨ ភាគរយនៃផលិតផលក្នុងស្រុកសរុប។
ចាប់តាំងពីឆ្នាំ២០២០មក សហគ្រិនខ្មែរ បាន និងកំពុងអនុវត្ដកម្មវិធីជាច្រើន ដើម្បីផ្តល់ជំនួយហិរញ្ញប្បទានដោយផ្ទាល់ដល់ធុរកិច្ចថ្មី និងសហគ្រាសធុនតូចនិងមធ្យមរាប់រយ មកពីបណ្ដារាជធានី-ខេត្ដទូទាំងប្រទេស។ ការគាំទ្ររបស់សហគ្រិនខ្មែរដល់សហគ្រាសក្នុងស្រុក ដូចជាតាមរយៈការបណ្តុះពន្លកសហគ្រិនកម្រិតវិទ្យាល័យដើម្បីចាក់ឫសវប្បធម៌សហគ្រិនភាព ការផ្តល់វគ្គបណ្តុះបណ្តាលទៅកាន់ធុរកិច្ចបង្កើតថ្មី ការបង្កើតវេទិកាប្រកួតប្រជែងគំរូអាជីវកម្ម ការភ្ជាប់ទំនាក់ទំនងសហគ្រិនជាមួយវិនិយោគិន និងការផ្តល់ហិរញ្ញប្បទានតាមរយៈកម្មវិធីនានា។
ថ្លែងក្នុងពិធីប្រគល់កញ្ចប់ជំនួយហិរញ្ញប្បទាននេះ ឯកឧត្តមបណ្ឌិត ឈៀង វណ្ណមុនិណ្ឌ នាយកប្រតិបត្តិសហគ្រិនខ្មែរ បានលើកឡើងថា៖ «តបតាមការណែនាំរបស់ក្រុមប្រឹក្សាបរធនបាល សហគ្រិនខ្មែរនឹងបន្តការគាំទ្ររបស់ខ្លួន តាមរយៈការបង្កើតកម្មវិធីមានអត្ថប្រយោជន៍បន្ថែមទៀត ដែលហៅថា កញ្ចប់ជំនួយសហគ្រិនខ្មែរ++ ដល់សហគ្រិនដែលធ្លាប់បានឆ្លងកាត់ និងទទួលភាពជោគជ័យជាមួយសហគ្រិនខ្មែរកន្លងមក។ កិច្ចការនេះត្រូវបានធ្វើឡើងដើម្បីពង្រឹងសមត្ថភាពសហគ្រិន និងបង្កើនលទ្ធភាពឈរជើងនៅលើទីផ្សារបានទូលំទូលាយ ព្រមទាំងបង្កើនប្រសិទ្ធភាពប្រតិបត្តិការអាជីវកម្មរបស់ពួកគាត់។»
កញ្ចប់ជំនួយសហគ្រិនខ្មែរដែលបានផ្តល់ជូនធុរកិច្ចថ្មី និងសហគ្រាសធុនតូច និងមធ្យម នៅពេលនេះរួមមានពីរកម្មវិធី៖
កម្មវិធីទី១ គឺកញ្ចប់ជំនួយសហគ្រិនខ្មែរ ដែលជាកម្មវិធីយុទ្ធសាស្រ្តដ៏មុតស្រួចមួយ បង្កើតឡើងដើម្បីរក្សាលំនឹងដល់ធុរកិច្ចថ្មី និងសហគ្រាសធុនតូចនិងមធ្យមដែលមានសក្កានុពល ហើយស្ថិតនៅក្នុងវិស័យអាទិភាព។ កញ្ចប់ជំនួយនេះមានលក្ខណៈ (១) ប្រកួតប្រជែងខ្ពស់ និងមានការផ្សព្វផ្សាយទូលំទូលាយដែលគ្រប់ដណ្តប់ ២៥ រាជធានី-ខេត្ត (២) មានស័ក្តិសិទ្ធភាពខ្ពស់ក្នុងការទទួលបានហិរញ្ញប្បទានគាំទ្រដោយផ្ទាល់ និងទាន់ពេល (៣) មានប្រសិទ្ធភាពខ្ពស់ និងចំគោលដៅក្នុងការស្នើ និងប្រើប្រាស់ថវិកាសម្រាប់ធុរកិច្ចថ្មី និងសហគ្រាសធុនតូចនិងមធ្យម និង (៤) មានសុក្រិតភាពខ្ពស់ចំពោះការវាយតម្លៃ និងដាក់ពិន្ទុពីគណៈកម្មការជំនាញដែលមកពីស្ថាប័នធំៗ ដូចជាគ្រឹះស្ថានហិរញ្ញវត្ថុ និងក្រុមហ៊ុនវិនិយោគ សាកលវិទ្យាល័យ ដៃគូអភិវឌ្ឍន៍ និងបណ្តាក្រុមហ៊ុននានា។
កម្មវិធីទី២ គឺកម្មវិធីកៀរគរថវិកាសម្រាប់សហគ្រាសធុនតូច និងមធ្យម ដែលផ្ដល់ការបណ្ដុះបណ្ដាល ដោយអ្នកជំនាញផ្នែកវិនិយោគ ទៅដល់ធុរកិច្ចដែលមានបំណងស្វែងរកថវិកាបន្ថែម ក្នុងការពង្រីកប្រតិបត្ដិការរបស់ខ្លួន។ កម្មវិធីនេះជាយន្ដការដែលមានសារៈសំខាន់ ក្នុងការធានាឱ្យមានចីរភាព សម្រាប់សហគ្រាសធុនតូច និងមធ្យម ក្នុងការទទួលបានហិរញ្ញប្បទានពីទីផ្សារឯកជន។
សហគ្រិនដែលមានបំណងចូលរួមក្នុងកម្មវិធីខាងលើ សូមចុះឈ្មោះតាមរយៈតំណភ្ជាប់ខាងក្រោម៖ កញ្ចប់ជំនួយសហគ្រិនខ្មែរ ++