ឯកឧត្ដមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ អញ្ជេីញបំពាក់មេដាយសហមេត្រីដល់ជំនាញការបរទេសមកពីអង្គការPTB អាល្លឺម៉ង់
ឯកឧត្ដមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ អញ្ជេីញបំពាក់មេដាយសហមេត្រីដល់ជំនាញការបរទេសមកពីអង្គការPTB អាល្លឺម៉ង់
បន្ទាប់ពីបានមកបំពេញបេសកកម្មក្នុងប្រទេសកម្ពុជា ដេីម្បីវាយតម្លៃពីលទ្ធផលនៃការអនុវត្តគម្រោងពង្រឹងហេដ្ឋារចនាសម្ព័ន្ធគុណភាពជាតិ (NQI) ក្នុងដំណាក់កាលទី១ ប្រកបដោយជោគជ័យ ហេីយចាប់ផ្តេីមអនុវត្តដំណាក់កាលទី២បន្តទៀតចាប់ពីថ្ងៃទី៤ ដល់ថ្ងៃទី១១ ខែឧសភា ឆ្នាំ២០២២ ក្រុមបេសកកម្មមកពីអង្គការPTB ចំនួន០៤ រូប ត្រូវបានរាជរដ្ឋាភិបាលកម្ពុជាចេញអនុក្រឹតស្តីពីការជូនមេដាយសហមេត្រី ដែលមានស្នាដៃល្អក្នុងកិច្ចសហប្រតិបត្តិការជាមួយមជ្ឈមណ្ឌលមាត្រាសាស្ត្រជាតិ នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ហេីយត្រូវបានរៀបចំពិធីបំពាក់ជូននៅរសៀលថ្ងៃទី ០៦ ខែឧសភា ឆ្នាំ២០២២ ដោយឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្រ្តីរដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នៅទីស្តីការក្រសួង ។
ចំពោះប្រភេទមេដាយសហមេត្រីដែលត្រូវបំពាក់ជូននាឱកាសនោះ រួមមាន៖ក-មេដាយសហមេត្រី ថ្នាក់សេនា ត្រូវបានបំពាក់ជូន ១-លោក UWE Miesner ប្រធានកិច្ចសហប្រតិបត្តិការអន្តរជាតិក្នុងតំបន់អាសុីប៉ាសុីហ្វិច ខ-មេដាយសហមេត្រី ថ្នាក់អស្សឬទ្ធិ ត្រូវបានបំពាក់ជូន ១-លោកស្រី CORA Roos អ្នកសម្របសម្រួលគម្រោងពង្រឹងហេដ្ឋារចនាសម្ព័ន្ធគុណភាពក្នុងប្រទេសកម្ពុជា ២-លោកបណ្ឌិត ULRIKE Lechner អ្នកជំនាញការ បច្ចេកទេសរបស់ PTB ៣-លោកបណ្ឌិត CLEMENTS Sanetra អ្នកជំនាញការបច្ចេកទេសជាន់ខ្ពស់របស់PTB ។
មានប្រសាសន៍នាឱកាសនោះ ឯកឧត្ដមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ បានថ្លែងអំណរគុណដល់ក្រុមបេសកកម្ម PTB អាល្លឺម៉ង់ដែលបានសហការគាំទ្រគម្រោងពង្រឹងហេដ្ឋារចនាសម្ព័ន្ធជាតិនៅក្នុងប្រទេសកម្ពុជា (NQI) មិនត្រឹមនៅក្នុងមជ្ឈមណ្ឌលមាត្រាសាស្រ្តជាតិប៉ុណ្ណោះទេ តែក៏បានជួយនៅក្នុងវិទ្យាស្ថានស្តង់ដារកម្ពុជា និងនាយកដ្ឋានវាយតម្លៃទទួលស្គាល់ចំណុះក្រសួងផងដែរ ។ ជំនួយបច្ចេកទេសនេះ ពិតជាមានសារៈសំខាន់ណាស់ដែលកម្ពុជាត្រូវការនូវហេដ្ឋារចនាសម្ព័ន្ធគុណភាពជាតិមួយរឹងមាំ ដេីម្បីត្រួតពិនិត្យ វាយតម្លៃភាពអនុលោមសម្រាប់ទំនិញទាំងការប្រេីប្រាស់ក្នុងស្រុក ជាពិសេសទំនិញ ឬផលិតផលនាំចេញឲ្យស្របតាមស្តង់ដារ និងបទដ្ឋានបច្ចេកទេស និងមានឧត្តមភាពប្រកួតប្រជែង ស្របពេលដែលកម្ពុជាមានសេដ្ឋកិច្ចពឹងផ្អែកលេីការនាំចេញ ។
តំណាងក្រុមបេសកកម្មមកពីអង្គការ PTB បានបង្ហាញនូវទឹកចិត្តរីករាយចំពោះការទទួលបានមេដាយកិត្តិយសពីរារដ្ឋាភិបាលកម្ពុជា តាមរយៈកិច្ចខិតខំប្រឹងប្រែងនិងស្នាដៃរបស់ខ្លួនកន្លងមក និងបានបង្ហាញនូវការប្តេជ្ញាចិត្តបន្តចូលរួមសហការជាមួយដៃគូកម្ពុជាបន្តទៀតក្នុងការពង្រឹងហេដ្ឋារចនាសម្ព័ន្ធគុណភាពជាតិកម្ពុជាឲ្យមានភាពកាន់តែរឹងមាំឡេីង ដែលមានគុណតម្លៃសំខាន់សម្រាប់ពង្រឹងខឿនសេដ្ឋកិច្ចជាតិ និងសក្តានុពលនាំចេញ ។