ពិធីប្រកាសចូលកាន់តំណែងអគ្គនាយករដ្ឋាករទឹកស្ទឹងត្រែង និងក្រុមប្រឹក្សាភិបាលដ្ឋាករទឹកស្ទឹងត្រែង
ឯកឧត្តមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ អញ្ជេីញជាអធិបតីក្នុងពិធីប្រកាសចូលកាន់តំណែងអគ្គនាយករដ្ឋាករទឹកស្ទឹងត្រែង និងក្រុមប្រឹក្សាភិបាលដ្ឋាករទឹកស្ទឹងត្រែង
នៅព្រឹកថ្ងៃទី១២ខែ កក្កដា ឆ្នាំ២០២៣ ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្រ្តី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានអញ្ជេីញជាអធិបតីក្នុងពិធីប្រកាសចូលកាន់តំណែងអគ្គនាយករដ្ឋាករទឹកស្ទឹងត្រែង និងក្រុមប្រឹក្សាភិបាលដ្ឋាករទឹក ស្ទឹងត្រែង នៅសាលប្រជុំសាលាខេត្តស្ទឹងត្រែង ។
តាមរបាយការណ៌សង្ខេបរបស់ ឯកឧត្តម អ៊ុំ សុថា រដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ស្តីពីដំណើរការរៀបចំបង្កើតរដ្ឋា
ករទឹកស្ទឹងត្រែង ដោយបានបញ្ជាក់ថា៖ដោយបាន មើលឃើញថា រដ្ឋាករទឹកខេត្តស្ទឹងត្រែងមានការពង្រីកសមត្ថភាពធំជាងមុន ជាមួយនឹងការដាក់ទុនវិនិយោគបង្កើតរោងចក្រថ្មីដ៏ធំមួយមិនធ្លាប់មានពីមុនមក ក្នុងសមត្ថភាព ១២.០០០ម៉ែត្រគូប/ក្នុងមួយថ្ងៃ លើសមត្ថភាពចាស់ដែលមានត្រឹម ៥.៨៨០ម៉ែត្រគូប/ក្នុង១ថ្ងៃ (រាប់បញ្ចូលទាំងប្រព័ន្ធសម្អាតទឹក UFM (Ultra Filtration Membrane) ៣.០០០ម៉ែត្រគូប/ក្នុង១ថ្ងៃផងដែរ) ជាមួយនឹងថវិកាហិរញ្ញប្បទានឥណទានក្នុងគម្រោងធនាគារអភិវឌ្ឍន៍អាស៊ី(ADB) ប្រមាណ ១៣លានដុល្លា, ឯកឧត្តមកិត្តិសេដ្ឋាបណ្ឌិត ទេសរដ្ឋមន្ត្រី បានចាត់ទុកថា ដល់ពេលវេលាចាំបាច់មួយ ដែលត្រូវតែកែប្រែអង្គភាពរដ្ឋាករទឹកខេត្តស្ទឹងត្រែង ទៅជានីតិបុគ្គលនៃនីតិសាធារណៈ ដែលមានស្វ័យភាពរដ្ឋបាល និងហិរញ្ញវត្ថុពេញលេញ ក្នុងការដឹកនាំ និងគ្រប់គ្រងប្រតិបត្តិការរបស់ខ្លួន ដោយការទទួលខុសត្រូវកាន់តែខ្ពស់ ប្រកបដោយគណនេយ្យភាព និងតម្លាភាព ស្របតាមបទប្បញ្ញត្តិជាធរមាន និងជាសហគ្រាសសាធារណៈ ដែលមានដើមទុនឬភាគហ៊ុន១០០% ជារបស់រដ្ឋ។
ភ្ជាប់ជាមួយកិច្ចការនេះ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានរៀបចំសេចក្តីព្រាងអនុក្រឹត្យស្ដីពីការតែងតាំងក្រុមប្រឹក្សាភិបាលរដ្ឋាករទឹកស្ទឹងត្រែងអាណត្តិទី១ និងសេចក្ដីព្រាងអនុក្រឹត្យស្ដីពីការតែងតាំងអគ្គនាយករដ្ឋាករទឹកស្ទឹងត្រែង ។ ក្នុងនោះក្នុងគោលបំណងដេីម្បីពន្លឿនការអនុវត្តបែបបទនិងនីតិវិធី, ក្រសួងបានបញ្ជូនសេចក្ដីព្រាងអនុក្រឹត្យទាំង៣ខាងលើ គោរពជូន សម្តេចតេជោនាយករដ្ឋមន្រ្តី ដើម្បីពិនិត្យសម្រេចដ៏ខ្ពង់ខ្ពស់ស្របពេលជាមួយគ្នាតែម្តង។
ជាលទ្ធផល អនុក្រឹត្យចំនួន៣ ត្រូវបានទទួលការឯកភាពដ៏ខ្ពង់ខ្ពស់ពី សម្តេចតេជោនាយករដ្ឋមន្រ្តី និងដាក់ឱ្យអនុវត្ត រួមមាន៖
១) អនុក្រឹត្យលេខ១៣១ អនក្រ.បក ចុះថ្ងៃទី២០ ខែមិថុនា ឆ្នាំ២០២៣ ស្តីពីការបង្កើតរដ្ឋាករទឹកស្ទឹងត្រែងជាសហគ្រាសសាធារណៈ
២)អនុក្រឹត្យលេខ៧២៣ អនក្រ.តត ចុះថ្ងៃទី២១ ខែមិថុនា ឆ្នាំ២០២៣ ស្តីពីការតែងតាំងអគ្គនាយករដ្ឋាករទឹកស្ទឹងត្រែង
៣) អនុក្រឹត្យលេខ៧២៤ អនក្រ.តត ចុះថ្ងៃទី២១ ខែមិថុនា ឆ្នាំ២០២៣ ស្តីពីការតែងតាំងក្រុមប្រឹក្សាភិបាលរដ្ឋាករទឹកស្ទឹងត្រែង។
មានប្រសាសន៍នាឱកាសនោះឯកឧត្ដមកិត្តិសេដ្ឋាបណ្ឌិត ទេសរដ្ឋមន្រ្តី ចម ប្រសិទ្ធ បានសម្តែងនូវទឹកចិត្តសោមនស្សរីករាយ និងអបអរសាទរចំពោះការរៀបចំពិធីខាងលេី កេីតចេញកិច្ចខិតខំប្រឹងប្រែងរួម ដែលបានបង្ហាញឱ្យឃើញអំពីរបត់ថ្មីនៃកំណែទម្រង់ជាប្រវត្តិសាស្ត្រមួយរបស់រដ្ឋាករទឹកស្ទឹងត្រែង ដោយពីមុនមានឈ្មោះថា អង្គភាពរដ្ឋាករទឹកខេត្តស្ទឹងត្រែង ហេីយបានប្រែក្លាយទៅជាសហគ្រាសសាធារណៈពេញលេញតាមផ្លូវច្បាប់ ។
ការធ្វើកំណែទម្រង់នេះ នឹងជះឥទ្ធិពលជាវិជ្ជមានដល់ការពង្រឹងចីរភាពរបស់អង្គភាព, បង្កើននូវប្រសិទ្ធភាពក្នុងការគ្រប់គ្រង ដឹកនាំ ចាត់ចែងការងាររបស់អង្គភាពដោយភាពម្ចាស់ការ,កាត់បន្ថយការពឹងផ្អែកជំនួយហិរញ្ញវត្ថុពីថវិកាជាតិ,បង្កើនការទទួលខុសត្រូវកាន់តែខ្ពស់ ប្រកបដោយគណនេយ្យភាព និងតម្លាភាព ក្នុងគ្រប់គ្រងការធ្វើអាជីវកម្ម និងការផ្តល់សេវាផ្គត់ផ្គង់ទឹកស្អាតឱ្យធានាបាន គុណភាព សុវត្ថិភាព និរន្តរភាព និងថ្លៃសមរម្យ ស្របតាមគោលដៅរបស់រាជរដ្ឋាភិបាល ។
កំណែទម្រង់នេះ ក៏មានការចូលរួមអបអរសាទរ និងគាំទ្រផងដែរពីដៃគូអភិវឌ្ឍន៍ ជាពិសេស ធនាគារអភិវឌ្ឍន៍អាស៊ី(ADB) និងទីភ្នាក់ងារសហប្រតិបត្តិការអន្តរជាតិរបស់ជប៉ុន ហៅថា JICA ។