ពិធីសម្ពោធដាក់ឲ្យប្រេីប្រាស់ជាផ្លូវការនូវសៀវភៅសក្បាលទី២និងក្បាលទី៣ របស់សមាគមសហគ្រិនស្ត្រីកម្ពុជា
ពិធីសម្ពោធដាក់ឲ្យប្រេីប្រាស់ជាផ្លូវការនូវសៀវភៅសក្បាលទី២និងក្បាលទី៣ របស់សមាគមសហគ្រិនស្ត្រីកម្ពុជា
ក្រោមជំនួយហិរញ្ញវត្ថុ និងបច្ចេកទេសពីទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ(USAID) តាមរយៈអង្គការ Pact Cambodia និងក្រោមគម្រោងសហគ្រិននារីសកម្ម បានសហការគាំទ្រសៀវភៅ ស ក្បាលទី២ ដែលមានចំណងជេីងថា ៖”ការលេីកកម្ពស់ការចូលទៅកាន់ទីផ្សារ ,ការអភិវឌ្ឍផលិតផលនិងសេវាកម្មប្រកបដោយគុណភាពសម្រាប់សហគ្រិនស្ត្រីក្នុងប្រទេសកម្ពុជា”និងមជ្ឈមណ្ឌលសម្រាប់សហគ្រាសឯកជនអន្តរជាតិ (CIPE) បានគាំទ្រសៀវភៅ សក្បាលទី៣ ដែលមានចំណងជេីងថា៖”ការពង្រឹងភាពធន់នៃធុរកិច្ចសហគ្រាសធុនតូចបំផុត តូច និងមធ្យម (MSMEs)សម្រាប់សហគ្រិនស្ត្រីនៅកម្ពុជា ,ការបង្កើតបរិយាកាសធុរកិច្ចអំណោយផល ការជម្នះ និងការគ្រប់គ្រងហានិភ័យ “ បានត្រូវបោះពុម្ពរួចរាល់មក សៀវភៅ ស ទាំងពីរក្បាលនេះ ត្រូវបានប្រារព្វពិធីសម្ពោធដាក់ឲ្យប្រេីប្រាស់ជាផ្លូវការ ក្រោមអធិបតីភាព ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្រ្តី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នៅទីស្តីការក្រសួង ។ សមាសភាពចូលរួមពីស្ថាប័នពាក់ព័ន្ធ និងអង្គការដៃគូនាឱកាសនោះ រួមមាន៖-លោកជំទាវ ចម និម្មល រដ្ឋលេខាធិការក្រសួងពាណិជ្ចកម្ម-លោកជំទាវ គង់ សូរីតា អនុរដ្ឋលេខាធិការក្រសួងកិច្ចការនារី -លោក ជំទាវ អេង លីគង់ ប្រធានបណ្ដាញសាខានិងស្ត្រីកម្ពុជា− អ្នកស្រី សាប៊ីន យ៉ៅគ្គឺស, នាយកប្រចាំប្រទេសនៃអង្គការPact Cambodia − អ្នកស្រី ចេននីហ្វឺ អែនឌ័រសាន់, មន្ត្រីកម្មវិធីជាន់ខ្ពស់នៃមជ្ឈមណ្ឌលសម្រាប់សហគ្រាសឯកជនអន្តរជាតិ-លោក សុខ ណារិន ប្រធានតំណាងប្រចាំកម្ពុជា នៃអង្គការ UNIDO ព្រមទាំងសហការីជាច្រេីនរូបទៀត ដែលបានចូលរួមដោយផ្ទាល់ និងតាមប្រព័ន្ធអនឡាញ ។
តាមប្រសាសន៍របស់លោកជំទាវឧកញ៉ា មហាឧបាសិកាពុទ្ធសាសនូបត្ថម្ភក៍ កែវ មុំ ប្រធានសមាគមស្ត្រីិកម្ពុជា បានបញ្ជាក់ថា៖ការកសាង “សៀវភៅ “ស” ទាំង២នេះ គឺពិតជាមាសសារៈសំខាន់ខ្លាំងណាស់ ពីព្រោះវាគឺជាឯកសារមួយដ៏សំខាន់សម្រាប់សមាគមសហគ្រិនស្រ្តីកម្ពុជា, អង្គការ, ស្ថាប័នរដ្ឋ និងឯកជន, ដៃគូអភិវឌ្ឍន៍, ស្ថាប័នឬអ្នកស្រាវជ្រាវជាដើម ដើម្បីប្រើប្រាស់ជាឯកសារក្នុងការធ្វេីគោលនយោបាយ ឬការកសាងសមត្ថភាព ឬស្វែងរកការគាំទ្រមតិ ក្នុងន័យការពារផលប្រយោជន៍របស់ស្ត្រីនិយាយដោយឡែក និងដើម្បីគាំទ្រដល់កំណើនសេដ្ឋកិច្ច ពង្រីកអេកូសហគ្រិនភាព និងស្ថិរភាពសង្គមនិយាយជារួម ដែលការងារទាំងអស់នេះគឺស្របទៅតាមទស្សនវិស័យ និងបេសកកម្មរបស់យើង។ ក្នុងនោះ តាមរយៈបទបង្ហាញរបស់លោកជំទាវ ម៉ម ដាត្ថាលីណែត អនុប្រធានទទួលបន្ទុកកិច្ចការផ្ទៃក្នុងនៃសមាគមសហគ្រិនស្ត្រីកម្ពុជា ស្តីពីខ្លឹមសារនៃសៀវភៅសក្បាលទី២ និងទី៣ ក៏បានបញ្ជាក់ផងដែរថា៖ដើម្បីផលិតបានជា សៀវភៅស នេះឡើង យើងបានឆ្លងកាត់នូវការសិក្សាស្រាវជ្រាវ ប្រមែប្រមូល និងចងក្រងនូវរាល់បញ្ហាប្រឈម និងសំណើដំណោះស្រាយនានារបស់សហគ្រិនស្រ្តីនៅកម្ពុជាយើង តាមរយៈការធ្វើវេទិកាសាធារណៈនៅតាមខេត្តគោលដៅប្រមាណជា១១, ការស្ទង់មតិ, ការប្រជុំក្រុមគោលដៅ, ការបោះឆ្នោតជ្រើសរើសបញ្ហាអាទិភាព, ការកសាងសេចក្តីព្រាង, ការសិក្សា និងប្រមូលព័ត៌មាន និងឆ្លងកាត់សិក្ខាសាលា និង ការពិគ្រោះយល់ និងការត្រួតពិនិត្យ ពីអ្នកជំនាញជាតិ និងអន្តរជាតិនានា។
តាមរយៈការចងក្រងនូវសៀវភៅសទាំងពីរក្បាលនេះ យេីងបានកំណត់បញ្ហាប្រឈមជាអាទិភាពចំនួន៣ សម្រាប់សៀវភៅសក្បាលទី២ គឺ៖ទី១-លទ្ធភាពទទួលបានទីផ្សារ និងការផ្សព្វផ្សាយផលិតផលក្នុងស្រុកនៅមានកម្រិត ទី២-កង្វះទុនក្នុងការពង្រីក និងបង្កេីតអាជីវកម្ម ទី៣-ខ្វះជំនាញឌីជីថលនិងចំណេះដឹងព័ត៌មានវិទ្យា ។ ចំណែកសៀវភៅសក្បាលទី៣ ក៏បានកំណត់បញ្ហាប្រឈមអាទិភាពចំនួន៣ ផងដែរគឺ ទី១-បុគ្គលិកខ្វះជំនាញ និងប្រាក់ឈ្នួលខ្ពស់ ទី២-ការលំបាកទទួលបានប្រាក់កម្ចីពីធនាគារសម្រាប់អាជីវកម្មខ្នាតមីក្រូ ទី៣-ផលប៉ះពាល់នៃមេរោគឆ្លងកូវីដ-១៩ មកលេីអាជីវកម្ម ។
ជាមួយគ្នានេះបទបង្ហាញក៏បានលេីកឡេីងពីសំណេីរ និងអនុសាសន៍គោលនយោបាយសម្រាប់រដ្ឋាភិបាល ស្ថាប័នហិរញ្ញវត្ថុនិងដល់ដៃគូអភិវឌ្ឍមានដូចជា៖-បង្កេីតឲ្យមានមជ្ឈមណ្ឌលសេវាកម្មអាជីវកម្មខ្នាត MSMEs-បង្កេីតយុទ្ធនាការផ្សព្វផ្សាយផលិតផលក្នុងស្រុក-បង្កេីតច្បាប់ Franchise និងe-Franchise ដេីម្បីផ្តល់ឱកាសដល់អាជីវកម្មស្ត្រី-ពង្រឹងភាពធន់ខ្នាតMSMEs របស់ស្ត្រីដេីម្បីរក្សាប្រតិបត្តិការ និងការងារ -បង្កេីនចំណេះដឹងផ្នែកហិរញ្ញវត្ថុទូទៅរបស់សហគ្រិនស្ត្រី -និងពិនិត្យនិងគាំទ្រគម្រោងការសន្សំសហករណ៍ ដែលអាចផ្តល់ប្រាក់កម្ចីមិនមានទ្រព្យបញ្ចាំជាដេីម ។
មានប្រសាសន៍ក្នុងអង្គពិធី ឯកឧត្ដមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់សមាគម និងថ្លែងអំណរគុណដល់អង្គការជាដៃគូដែលបានសហការគាំទ្រលេចចេញនូវសៀវភៅសក្បាលទី២ និងក្បាលទី៣នេះឡេីង បន្ទាប់ពីសៀវភៅស ក្បាលទី១ ដែលមានចំណងជេីងថា៖"ការលេីកកំពស់ការទទួលបានការអប់រំ និងព័ត៌មានសម្រាប់សហគ្រិនស្ត្រីនៅកម្ពុជា"ត្រូវបានសម្ពោធដាក់ឲ្យប្រេីប្រាស់កាលពីខែកញ្ញាឆ្នាំ២០២០ កន្លងទៅ ។
ឯកឧត្ដមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ បានចាត់ទុកសៀវភៅសនេះ មានសារៈសំខាន់ ពីព្រោះ បានសិក្សាស្រាវជ្រាវតាមបែបវិទ្យាសាស្ត្រ ហេីយកំណត់បាននូវបញ្ហាជាអាទិភាព និងដាក់ចេញសំណេីរជាគោលនយោបាយសម្រាប់ពិចារណា ។
បន្ទាប់ពីនេះ យេីងទាំងអស់គ្នារួមមានស្ថាប័នពាក់ព័ន្ធ ស្ថាប័នហិរញ្ញវត្ថុ ក៏ដូចជាដៃគូអភិវឌ្ឍ យកសៀវភៅនេះមកសិក្សាស្រាវជ្រាវ តាមមុខសញ្ញា ហេីយឯកឧត្តមបានកំណត់រយៈពេលពីរខែទៀត ដេីម្បីជួបជុំគ្នាពិភាក្សារកដំណោះស្រាយជាក់ស្តែង ។
សូមបញ្ជាក់ថា៖នាឱកាសនោះ ក៏មានការធ្វេីបទបង្ហាញពីមន្ត្រីជំនាញរបស់ក្រសួងជូនអង្គពិធីស្វែងយល់ ទាក់ទងនឹងអត្ថប្រយោជន៍នៃការចុះបញ្ជីតាមប្រព័ន្ធអនឡាញ និងបទបង្ហាញពីគោលការណ៍ទូទៅអំពីសុវត្ថភាពចំណីអាហារផងដែរ ។