ក្រសួងឧស្សាហកម្ម វបន និងទីភ្នាក់ងារស្វីសសម្រាប់ការអភិវឌ្ឍនឹងពង្រឹងកិច្ចសហប្រតិបត្តិការដើម្បីគាំទ្រវិស័យធុរកិច្ច
ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានទទួលជួបគណៈប្រតិភូនៃទីភ្នាក់ងារស្វីសសម្រាប់ការអភិវឌ្ឍ និងកិច្ចសហប្រតិបត្តិការ (SDC) និងអង្គការ Swisscontact នៅថ្ងៃទី៣០ ខែវិច្ឆិកា ឆ្នាំ២០២៣ ដើម្បីពិភាក្សាអំពីការពង្រឹងកិច្ចសហប្រតិបត្តិការដែលមានស្រាប់ និងស្វែងរកឱកាសពង្រីកកិច្ចសហប្រតិបត្តិការថ្មីៗបន្ថែមទៀត។
ក្នុងជំនួបនោះ ភាគីទាំងពីរបានជម្រាបជូនគ្នាអំពីអាណត្តិកិច្ច និងរបៀបវារៈជាអាទិភាពរបស់ខ្លួន។ លោក Markus Buerli នាយកទីភ្នាក់ងារស្វីសសម្រាប់ការអភិវឌ្ឍ បានបញ្ជាក់ពីការប្តេជ្ញាចិត្តរបស់ទីភ្នាក់ងារ ដែលបានគាំទ្រកម្ពុជាក្នុងរយៈពេលប្រមាណជាបីទសវត្សរ៍ចុងក្រោយនេះ។
លោកក៏មានបំណងស្វែងយល់អំពីទិសដៅការងាររបស់សហគ្រិនខ្មែរ ដែលជាដៃគូសហការរបស់ខ្លួន ក្រោយការផ្លាស់ប្តូរប្រធានក្រុមប្រឹក្សាភិបាល មកក្រោមការដឹកនាំរបស់ឯកឧត្តមរដ្ឋមន្ត្រី ហែម វណ្ណឌី ដោយលោកសង្កត់ធ្ងន់លើសារៈសំខាន់នៃការបន្តកិច្ចសហប្រតិបត្តិការនេះ។
ឯកឧត្តមរដ្ឋមន្ត្រី បានថ្លែងអំណរគុណដល់ទីភ្នាក់ងារស្វីសសម្រាប់ការអភិវឌ្ឍ ដែលបានគាំទ្រដល់កម្ពុជានាពេលកន្លងមក រួមទាំងក្នុងវិស័យថែទាំសុខភាពកុមារ។ ឯកឧត្តមបានកោតសរសើរចំពោះកិច្ចសហការល្អរវាងអង្គការ Swisscontact និងសហគ្រិនខ្មែរ ក្នុងការអភិវឌ្ឍសហគ្រិនភាពនៅកម្ពុជា តាមរយៈគម្រោងលើកកម្ពស់ប្រព័ន្ធអេកូឡូស៊ី និងការវិនិយោគសហគ្រិនភាព (3Ei)។
ឯកឧត្តមបានបញ្ជាក់ជូនគណៈប្រតិភូថា សហគ្រិនខ្មែរនឹងបន្តអាណត្តិរបស់ខ្លួន ព្រមទាំងផ្តោតលើការគាំទ្រជាយុទ្ធសាស្ត្រដល់សហគ្រាសធុនតូច និងមធ្យម ដូចជាការធ្វើអាទិភាវូបនីយកម្ម ដោយគាំទ្រធុរកិច្ចកាតាលីករ (market catalysts) ដើម្បីជំរុញការអភិវឌ្ឍខ្សែច្រវាក់តម្លៃក្នុងវិស័យ និងអនុវិស័យជាក់លាក់មួយចំនួន ព្រមទាំងគាំទ្រដល់ការអភិវឌ្ឍវិស័យសេដ្ឋកិច្ចក្រៅប្រព័ន្ធ។
ឯកឧត្តមបានស្នើឱ្យទីភ្នាក់ងារស្វីសសម្រាប់ការអភិវឌ្ឍ បន្តគាំទ្រដល់ការរៀបចំផែនទីបង្ហាញផ្លូវប្រព័ន្ធអេកូឡូស៊ីសហគ្រិនភាពនៅកម្ពុជា និងសិក្សាឱកាសសហការជាមួយមជ្ឈមណ្ឌលផលិតភាពជាតិកម្ពុជា ដែលមានតួនាទីជំរុញការអភិវឌ្ឍជំនាញនៅនឹងកន្លែងការងារ និងជំរុញការអភិវឌ្ឍផលិតភាពជាតិ។