សេចក្តីប្រកាសព័ត៌មាន
 

ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នឹងរៀបចំសន្និបាតប្រចាំឆ្នាំ
នៅថ្ងៃទី២០ និង២១ ខែកុម្ភៈ ឆ្នាំ២០២៤  

ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នឹងរៀបចំ​សន្និបាតបូកសរុបលទ្ធផលការ​ងារ​ ឆ្នាំ២០២៣ និងលើកទិសដៅការងារឆ្នាំ២០២៤របស់ខ្លួន នៅថ្ងៃទី២០ និង២១ ខែកុម្ភៈ ឆ្នាំ២០២៤ នៅ​ទីស្តី​ការ​ក្រសួង ក្នុងរាជធានីភ្នំពេញ។

សន្និបាតប្រចាំឆ្នាំនេះនឹងពិភាក្សាលើប្រធានបទធំចំនួនបួនដែលមានសារៈសំខាន់សម្រាប់ការអភិវឌ្ឍរបស់កម្ពុជា៖ ហេដ្ឋារចនាសម្ព័ន្ធគុណភាពជាតិ របៀបវារៈអាទិភាពនៃវិស័យទឹកស្អាត កំណែទម្រង់សេវា​សាធារណៈ និងការជំរុញវិទ្យាសាស្រ្ត បច្ចេកវិទ្យា និងនវានុវត្តន៍​​ក្នុងអាណត្តិទី៧ នៃរដ្ឋសភា។

ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នឹងធ្វើជា​អធិប​តីក្នុងពិធីបើកសន្និបាត នៅថ្ងៃទី២០ ខែកុម្ភៈ។ ពិធីបិទសន្និបាតនឹងប្រព្រឹត្ត​ទៅនៅថ្ងៃទី២១ ខែកុម្ភៈ ឆ្នាំ២០២៤​​ ក្រោមអធិ​ប​តី​ភាពដ៏ខ្ពង់ខ្ពស់បំផុតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃ​ព្រះរាជា​​ណា​ចក្រកម្ពុជា។ តំណាងព្រឹទ្ធសភា រដ្ឋសភា រាជរដ្ឋាភិបាល ដៃគូ​អភិវឌ្ឍន៍ និង​វិស័យឯកជនសំខាន់ៗ ក៏​នឹងចូលរួមក្នុងសន្និបាទប្រចាំឆ្នាំនេះដែរ។

តាមរយៈសន្និបាតដែលនឹងប្រមូលផ្តុំភាគីពាក់ព័ន្ធពី​វិស័យ​ផ្សេងៗ ក្រសួងឧស្សាហកម្ម វិទ្យាសាស្ត្រ បច្ចេក​វិទ្យា និងនវានុវត្តន៍ មាន​បំណង​សម្រប​សម្រួលកិច្ចសន្ទនា ផ្លាស់​ប្តូរ​ការយល់ដឹង និងបង្កើនកិច្ចសហប្រតិបត្តិ​ការ ដើម្បី​រួមចំណែកពន្លឿនការអភិវឌ្ឍសង្គម-សេដ្ឋកិច្ចរបស់កម្ពុជា។

សន្និបាតប្រចាំឆ្នាំនេះមិនត្រឹមតែផ្តល់ជាវេទិកា ដើម្បីឆ្លុះបញ្ចាំងពីសមិទ្ធផលនៃឆ្នាំកន្លងទៅប៉ុណ្ណោះ​ទេ ប៉ុន្តែក៏ជាឱកាសមួយក្នុងការរៀបចំមាគ៌ានៃអាទិភាពការងារអនាគតរបស់ក្រសួងផងដែរ។ កិច្ច​ពិភាក្សាជាយុទ្ធ​សាស្ត្រ​ក្នុងអំឡុងពេលនៃសន្និបាតនេះនឹងកំណត់ទិសដៅសម្រាប់គំនិតផ្តួចផ្តើម និងកិច្ចខិតខំប្រឹងប្រែង​របស់​ក្រសួង​ក្នុងឆ្នាំ២០២៤ និងឆ្នាំជាបន្តបន្ទាប់។