បណ្ឌិត្យសភានគរបាលកម្ពុជាស្វែងរកកិច្ចសហប្រតិបត្តិការលើការបណ្តុះបណ្តាលផ្នែកវិទ្យាសាស្ត្រ បច្ចេកវិទ្យា និងនវានុវត្តន៍
នៅថ្ងៃទី០៤ ខែធ្នូ ឆ្នាំ២០២៣ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និង នវានុវត្តន៍ បានទទួលជួបគណៈប្រតិភូនៃបណ្ឌិត្យសភានគរបាលកម្ពុជា ដឹកនាំដោយឯកឧត្តម នាយឧត្តមសេនីយ៍សាស្ត្រាចារ្យ ឯក មនោសែន ប្រធានបណ្ឌិត្យសភានគរបាលកម្ពុជា។ កិច្ចប្រជុំបានផ្តោតលើការពង្រឹងកិច្ចសហប្រតិបត្តិការដើម្បីផ្តល់ការអប់រំ និងការបណ្តុះបណ្តាលមន្ត្រីនគរបាល និងមន្ត្រីពន្ធនាគារ ដោយផ្តោតសំខាន់លើការបណ្តុះបណ្តាលផ្នែកវិទ្យាសាស្ត្រ បច្ចេកវិទ្យា និងនវានុវត្តន៍។
ក្នុងជំនួបនោះ ឯកឧត្តម ឯក មនោសែន បានស្នើសុំការគាំទ្រពីក្រសួង រួមទាំងស្នើឯកឧត្តមរដ្ឋមន្ត្រីធ្វើបាឋកថា និងបញ្ជូនមន្ត្រីជំនាញដើម្បីចែករំលែកចំណេះដឹងជាមួយសិក្ខាកាមជាមន្ត្រីនគរបាល និងមន្ត្រីពន្ធនាគារនៃបណ្ឌិត្យសភានគរបាលកម្ពុជា។ គោលដៅគឺដើម្បីបំពាក់ចំណេះដឹង និងជំនាញចាំបាច់ដល់សិក្ខាកាមក្នុងការដោះស្រាយបញ្ហាថ្មីៗដែលកំពុងកើតមាននៅក្នុងវិស័យបច្ចេកវិទ្យា និងសន្តិសុខ រួមទាំងការការពារសុវត្ថិភាពឌីជីថលនៅលើគេហទំព័រ និងប្រព័ន្ធផ្សព្វផ្សាយសង្គម។
ឯកឧត្តមរដ្ឋមន្ត្រី បានជម្រាបជូនគណៈប្រតិភូអំពីអាណត្តិកិច្ចរបស់ក្រសួង និងបានបញ្ជាក់ពីសារៈសំខាន់នៃកិច្ចសហការរវាងការមន្ត្រីនគរបាល និងក្រសួង ក្នុងការអភិវឌ្ឍធនធានមនុស្សសម្រាប់យុគសម័យទំនើប។
ឯកឧត្តមបានលើកឡើងថា ក្រសួងឧស្សាហកម្ម វបន នឹងផ្តល់ការសហការផ្នែកបណ្តុះបណ្តាល រួមទាំងសមត្ថភាពផ្នែកមន្ទីរពិសោធន៍ និងចែករំលែកនូវព័ត៌មាន និងចំណេះដឹងក្នុងវិស័យដែលក្រសួងទទួលបន្ទុក។
ឯកឧត្តមក៏បានលើកឡើងពីតម្រូវការនៃកិច្ចសហការ រវាងក្រសួង និងមន្ត្រីអនុវត្តច្បាប់ ដើម្បីលើកកម្ពស់អនុលោមភាពរបស់រោងចក្រ-សហគ្រាសផងដែរ។ ឯកឧត្តមបានសង្កត់ធ្ងន់លើសារៈសំខាន់នៃនវានុវត្តន៍ក្នុងវិស័យសាធារណៈ ដោយផ្តោតលើការបង្កើតតម្លៃបន្ថែម និងថាវិស័យសាធារណៈគួរឈានមុខលើផ្នែកនវានុវត្តន៍។