ភ្នំពេញ ថ្ងៃទី៤ ខែធ្នូ ឆ្នាំ២០២៣ – ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍ នៅថ្ងៃទី៤ ខែធ្នូ ឆ្នាំ២០២៣ បានទទួលជួបសំណេះសំណាលជាមួយជ័យលាភីនវានុវត្តន៍​កម្ពុជាចំនួន​១០​រូប ដែលត្រូវបានជ្រើសរើសឱ្យចូលរួមក្នុង វេទិកាឫសគល់នវានុវត្តន៍អាស៊ាន-ឥណ្ឌា ឆ្នាំ២០២៣ ។ ជ័យលាភី​ទាំងនេះ រួមមានអ្នកនវានុវត្តន៍ជាសិស្ស និងអ្នកនវានុវត្តន៍តាមសហគមន៍ ដែលត្រូវបានទទួលស្គាល់​ចំពោះការរួម​ចំណែកដ៏សំខាន់របស់ពួកគេដល់វិស័យនវានុវត្តន៍។

នៅក្នុងជំនួបនោះ ឯកឧត្តមរដ្ឋមន្ត្រី បានគូសបញ្ជាក់ពីសារៈសំខាន់នៃការបន្តរៀនសូត្រ និងការសហការ​គ្នា​ក្នុង​វិស័យ​នវានុវត្តន៍។ ឯកឧត្តមបានលើកទឹកចិត្តអ្នកនវានុវត្តន៍កម្ពុជាឱ្យចែករំលែកគំនិត​ជាមួយមិត្តភ័ក្តិ​នៅក្នុងតំបន់ និងមិត្តភ័ក្តិ​មកពីប្រទេសឥណ្ឌា ព្រមទាំងចូលរួមអភិវឌ្ឍប្រព័ន្ធអេកូឡូស៊ីនវានុវត្តន៍នៅ​កម្ពុជា។

ឯកឧត្តមបានណែនាំដល់ជ័យលាភីទាំងអស់ឱ្យគិតមិនត្រឹមតែពីដំណើរការនវានុវត្តន៍ប៉ុណ្ណោះទេ តែត្រូវ​សិក្សា​​ខ្សែច្រវាក់​ផលិតកម្មទាំងមូល ដោយកំណត់យន្តការទីផ្សារ និងតួអង្គសំខាន់ៗ​ដែលអាចទទួលយក​ដំណោះ​ស្រាយ​នវានុវត្តន៍របស់ពួកគេ។ ឯកឧត្តមរដ្ឋមន្ត្រីបានបន្ថែមទៀតថា អ្នកនវានុវត្តន៍ត្រូវតែភ្ជាប់​ទំនាក់ទំនងជាមួយ​គ្នា ដើម្បីបង្កើតជាអេកូឡូស៊ី និងថានវានុវត្តន៍ត្រូវតែបង្កើត​តម្លៃ​បន្ថែម និងត្រូវតែអាចពង្រីកផលឱ្យបានកាន់តែទូលំ​ទូលាយ។

វេទិកាឫសគល់នវានុវត្តន៍អាស៊ាន-ឥណ្ឌា ដែលត្រូវបានប្រារព្ធឡើងជារៀងរាល់ឆ្នាំ ដោយមានការផ្លាស់​វេន​ក្នុង​ចំណោម​​រដ្ឋសមាជិកអាស៊ាន គឺជាវេទិកានវានុវត្តន៍ថ្នាក់តំបន់មួយ ដែលគាំទ្រដោយសាធារណរដ្ឋ​ឥណ្ឌា។ វេទិកា​ឆ្នាំ២០២៣នេះ ត្រូវបានរៀបចំដោយប្រទេសម៉ាឡេស៊ី ចាប់ពីថ្ងៃទី២៨ ដល់ថ្ងៃទី ៣០ ខែវិច្ឆិកា នៅលើកោះឡាំកាវី រដ្ឋកេដា ដោយមានអ្នកនវានុវត្តន៍ប្រមាណ២០០នាក់ ចូលរួមផ្លាស់ប្តូរបទពិសោធន៍ និង​គំនិត ​នៅក្នុងវិស័យ​នវានុវត្តន៍។

ការជ្រើសរើសអ្នកនវានុវត្តន៍ក្នុងប្រទេសកម្ពុជា ត្រូវបានសម្របសម្រួលដោយលេខាធិការដ្ឋាន​នៃ​គណៈកម្មាធិ​កា​រ​វិទ្យាសាស្ត្រ បច្ចេកវិទ្យា និងនវានុវត្តន៍អាស៊ាន នៃអគ្គនាយកដ្ឋានវិទ្យាសាស្ត្រ បច្ចេកវិទ្យា និងនវានុវត្តន៍របស់​ក្រសួង​ឧស្សាហកម្ម វបន។

ជ័យលាភីសិស្សចំនួន ៥ នាក់ និងជ័យលាភីសហគមន៍ចំនួន ៥នាក់ ត្រូវបានជ្រើសរើសដើម្បីបង្ហាញពី​នវានុវត្តន៍​របស់​កម្ពុជា និងផ្តល់ឱ្យកាសដល់ពួកគេក្នុងការរៀនសូត្រ ប្រមូលការយល់ដឹងពីវិស័យនវានុវត្តន៍​ពីបណ្តាប្រទេស​អាស៊ាន និងសាធារណៈរដ្ឋឥណ្ឌា។