ពិធីប្រគល់ទទួលជាផ្លូវការអគារទីស្តីការថ្មីនៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍
ពិធីប្រគល់ទទួលជាផ្លូវការអគារទីស្តីការថ្មីនៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍
ក្រោមគំនិតផ្តួចផ្តេីមប្រកបដោយភាពឈ្លាសវៃ និងឆ្នៃប្រឌិតខ្ពស់របស់ឯកឧត្តមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ តាំងពីអតីតក្រសួងឧស្សាហកម្ម និងសិប្បកម្មនិងរហូតមកដល់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ឯកឧត្តមកិត្តិសេដ្ឋាបណ្ឌិតជាប្រធានស្ថាប័នបានខិតខំប្រឹងប្រែងយកអស់កំលាំងកាយស្មារតីនិងបញ្ញាញាណក្នុងការអភិវឌ្ឍក្រសួងលេីគ្រប់វិស័យឲ្យមានការរីកចម្រេីនជាបន្តបន្ទាប់រហូតដល់បច្ចុប្បន្ននេះ។ ក្នុងនោះការសាងសង់អគារទីស្តីការក្រសួង វិទ្យាស្ថាន មជ្ឈមណ្ឌល អគ្គនាយកដ្ឋាន មន្ទីរពិសោធន៍ និងបណ្តាអង្គភាពមន្ទីរជុំវិញ២៥ខេត្ត-រាជធានី ក្រោមឱវាទក្រសួងក៏ត្រូវបានសាងសង់ជាអគារថ្មីៗទាំងអស់ ព្រមទាំងបំពាក់នូវសំភារៈការិយាល័យគ្រប់គ្រាន់ដេីម្បីឲ្យថ្នាក់ដឹកនាំនិងមន្ត្រីរាជការ បានធ្វេីការងារប្រកបដោយភាពសមរម្យនិងមោទនភាព ។ ជាក់ស្តែងសម្រាប់អគារទីស្តីការក្រសួង បន្ទាប់ពីមានអគារថ្មីកំពស់៩ជាន់រួចហេីយ ឥឡូវអគារទីស្តីការកំពស់១៨ជាន់ថ្មីមួយទៀតត្រូវបានលេចជារូបរាងឡេីង នៅជាប់គ្នា តាមបណ្តោយមហាវិថីព្រះនរោត្តម ហេីយត្រូវបានប្រារព្វពិធីប្រគល់ទទួលជាផ្លូវការនៅព្រឹកថ្ងៃទី ២៥ ខែកក្កដា ឆ្នាំ២០២៣ ក្រោមអធិបតីភាពឯកឧត្ដមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្រ្តី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ។
តាមរបាយការណ៌របស់លោក ឃុន សេងផេង តំណាងក្រុមហ៊ុនសាងសង់ គឺក្រុមហ៊ុន ឃុន សៀ អុីមផត អុិចផត បានបញ្ជាក់ថា អគារទីស្តីការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍កំពស់១៨ជាន់ ចាប់ផ្តេីមការដ្ឋានសាងសង់កាលពីថ្ងៃទី១២ ខែធ្នូ ឆ្នាំ២០១៩ និងបញ្ចប់ការសាងសង់នៅថ្ងៃទី២២ ខែកក្កដា ឆ្នាំ២០២៣កន្លងទៅ ។
លោក ឃុន សេងផេង បានបញ្ជាក់បន្ថែមថា៖ក្នុងរយៈពេលនៃការសាងសង់ទីស្តីការក្រសួងជាង៣ឆ្នាំនេះ ក្រុមហ៊ុនរបស់លោក និងក្រុមហ៊ុនដៃគូគឺក្រុមហ៊ុន ម៉ាទីន ឌីហ្សាញ &សឹកសេស ប៊ីល ទទួលបានការគាំទ្រជានិច្ចទាំងផ្នែកពិគ្រោះយោបល់និងបច្ចេកទេសពីគណៈកម្មការសាងសង់របស់ក្រសួង ក្នុងកិច្ចសហការនិងយោគយល់គ្នាយ៉ាងល្អប្រសេីរ ។
មានប្រសាសន៍នាឱកាសនោះ ឯកឧត្តមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ បានបង្ហាញនូវទឹកចិត្តរីករាយ វាយតម្លៃខ្ពស់ ចំពោះសមិទ្ធិផលថ្មីនេះ និងកោតសរសេីរចំពោះកិច្ចសហការល្អរវាងគណៈកម្មការសាងសង់របស់ក្រសួង និងតំណាងក្រុមហ៊ុនសាងសង់ទាំងពីរ ជំរុញឲ្យដំណេីរការសាងសង់សម្រេចបានតាមការគ្រោងទុក និងអនុលោមតាមស្តង់ដាបច្ចេកទេសត្រឹមត្រូវ ។
ឯកឧត្តមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ បានបញ្ជាក់ថា៖ការទទួលបាននូវអគារថ្មីៗបន្តបន្ទាប់ ទាំងអគារទីស្តីការក្រសួង និងអគារនៅអង្គភាពក្រោមឱវាទ គឺជាការលេីកទឹកចិត្តដ៏ស័ក្តសមមួយពីរាជរដ្ឋាភិបាល និងក្រសួង ចំពោះថ្នាក់ដឹកនាំ និងមន្ត្រីគ្រប់លំដាប់ថ្នាក់ដែលបានខិតខំបំពេញការងារប្រកបដោយការទទួលខុសត្រូវខ្ពស់ និងសម្រេចបានលទ្ធផលគួរជាទីមោទន: ក្រោមម្លប់សន្តិភាព ដែលមានសម្តេចតេជោនាយករដ្ឋមន្ត្រីជាប្រមុខដឹកនាំ ប្រទេសដ៏វៀងវៃ និងប្រកបដោយកិត្តិបណ្ឌិតដ៏ខ្ពង់
ខ្ពស់បំផុត ។
សូមបញ្ជាក់ថា អគារថ្មីទីស្តីការរបស់ក្រសួងនេះ គឺមានជណ្តេីរយោងរថយន្តចំនួន០២គ្រឿង អាចចតរថយន្តនៅជាន់ទី១ ទី២ និងទី៣ បានចំនួន៤៥ គ្រឿង ។ ចំពោះថ្នាក់ដឹកនាំ ជារដ្ឋលេខាធិការ និងអនុរដ្ឋលេខាធិការក៏ត្រូវបានរៀបចំពិធីចាប់ឆ្នោត ដេីម្បីជ្រេីសរេីសជាន់ និងបន្ទប់ធ្វេីការ នាឱកាសនោះផងដែរ ។