English 
Khmer ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានទទួលអំណោយមនុស្សធម៌ពីFASMEC សម្រាប់ឧបត្ថម្ភពលរដ្ឋ ក្នុងតំបន់បិទខ្ទប់ជំងឺកូវីដ១៩
ថ្ងៃសុក្រ ១០កើត ខែជេស្ឋ ឆ្នាំឆ្លូវ ត្រីស័ក ពុទ្ធសករាជ២៥៦៥ ត្រូវនឹងថ្ងៃទី២១ ខែឧសភា ឆ្នាំ២០២១ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានទទួលអំណោយមនុស្សធម៌ពីFASMEC សម្រាប់ឧបត្ថម្ភពលរដ្ឋ ក្នុងតំបន់បិទខ្ទប់ជំងឺកូវីដ១៩ ទឹកប្រាក់ចំនួន ១២១.៦៩៤.០០០រៀល -សាប៊ូចំនួន៣០០ កញ្ចប់-ទឹកត្រី ទឹកស៊ីអ៊ីវ ចំនួន៦០០០ដប-ទឹកបរិសុទ្ធហាយតិចចំនួន២០០កេស-ពងពាន់ចំនួន២០០០គ្រាប់-មាន់សាច់១០០ក្បាល-សាច់កែច្នៃ១០០គីឡូក្រាម-សាច់ក្រកអប់ផ្សែងស្បែកស្រួយ៥០កញ្ចប់ -និងមាន់អាំង៥០ កញ្ចប់ ត្រូវបានរៀបចំពិធីប្រគល់ទទួល ក្រោមអធិបតីភាព ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្រ្តី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នៅទីស្តីការក្រសួង ។
មានប្រសាសន៍នាឱកាសនោះ ឯកឧត្ដមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ បានសម្តែងនូវទឹកចិត្តរីករាយ ដែលបានទទួលជំនួយពីកម្មវិធីមនុស្សធម៌របស់សម្ព័ន្ធសមាគមសហគ្រាសធនតូចនិងមធ្យម (FASMEC ) ដែលមានលោកឧកញ៉ា តែ តាំងប៉ ជាប្រធាន ដែលកន្លងមកតែងតែដេីរតួយ៉ាងសំខាន់ក្នុងករចូលរួមចំណែកអភិវឌ្ឍន៍សេដ្ឋកិច្ច សង្គមជាមួយរាជរដ្ឋាភិបាល ។ ជាក់ស្តែង ជំនួយមនុស្សធម៌នាថ្ងៃនេះ ពិតជាបានរួមចំណែកយ៉ាងសំខាន់ ជាមួយរាជរដ្ឋាភិបាលដែលកំពុងមមាញឹកក្នុងការទប់ស្កាត់ការរីករាលដាលនៃជំងឺកូវីដ១៩ ហេីយមានតម្រូវការក្នុងការឧបត្ថម្ភប្រជាពលរដ្ឋដែលស្ថិតក្នុងតបន់បិទខ្ទប់ ជាពិសេសតំបន់ក្រហម ។ ឯកឧត្តមកិត្តិសេដ្ឋាបណ្ឌិត បានបញ្ជាក់ថា ជំនួយទាំងអស់នេះ ឯកឧត្ដមកិត្តិសេដ្ឋាបណ្ឌិតនឹងឧបត្ថម្ភបន្តទៅសាលារាជធានីភ្នំពេញ នាថ្ងៃ២៤ ដេីមសប្តាហ៍ខាងមុខ ដេីម្បីឯកឧត្តមអភិបាលរាជធានីភ្នំពេញចាត់ចែងចែកជូនដល់ដៃប្រជាពលរដ្ឋ ដែលរស់ក្នុងតំបន់បិទខ្ទប់ និងស្នេីរអញ្ជេីញតំណាងមកពីFASMEC ចូលរួមកម្មវិធីប្រល់ទទួលនាពេលខាងមុខនេះដែរ ។
ឆ្លៀតឱកាសនោះ ឯកឧត្តមកិត្តិសេដ្ឋាបណ្ឌិត ទេសរដ្ឋមន្រ្តី ចម ប្រសិទ្ធ ក៏បានបញ្ជាក់ផងដែរថា ក្នុងនាមក្រសួង គឺយេីងបានធ្វេីរួចរាល់ហេីយចំពោះមន្ត្រីរាជការក្រោមឱវាទដែលជាប់ក្នុងតំបន់បិទខ្ទប់តំបន់កក្រហម គឺត្រូវបានឧបត្ថម្ភជាបន្តបន្ទាប់ គឺម្នាក់ៗទទួលបានទឹកប្រាក់ចំនួន១០០ដុល្លារអាមេរិក ដេីម្បីដោះស្រាយបន្ទុករបស់ពួកគាត់ក្នុងកាលៈទេសៈនេះ ។
លោកឧកញ៉ា តែ តាំងប៉ ប្រធាន FASMEC បានបង្ហាញនូវទឹកចិត្តរីករាយ និងបានបញ្ជាក់ថា កម្មវិធីមូលនិធិមនុស្សធម៌ កំពុងទទួលជំនួយឧបត្ថម្ភជាបន្តបន្ទាប់ពីសមាជិក ក៏ដូចជាតំណាងសមាគមតាមវិស័យនានា ហេីយនឹងខិតខំគៀងគរ ប្រមែប្រមូលយកមកជូនជាបន្តបន្ទាប់ទៀត តាមរយៈឯកឧត្តមកិត្តិសេដ្ឋាបណ្ឌិត ដេីម្បីបានចាត់ចែងបន្តតមលទ្ធភាពជាក់ស្តែង ។
