ពិធីចុះហត្ថលេខាស្តីពីកម្មសិទ្ធិបញ្ញាសម្រាប់នវានុវត្តន៍រវាងក្រសួង ឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ (MISTI) ជាមួយអង្គភាព JPO និងវិទ្យាស្ថាន ERIA ជប៉ុន

នៅរសៀលថ្ងៃទី ៣០ ខែមីនា ឆ្នាំ ២០២៣ នៅទីស្តីការក្រសួង មានរៀបចំពិធី ចុះ ហត្ថលេខា ស្តីពីកម្មសិទ្ធិបញ្ញា សម្រាប់នវានុវត្តន៍ រវាង ក្រសួង ឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ MISTI)ជាមួយ អង្គភាព ប្រកាសនីយបត្រ តក្កកម្ម នៃប្រទេសជប៉ុន(JPO) និងវិទ្យាស្ថាន ស្រាវជ្រាវ សេដ្ឋកិច្ច នៃ អាស៊ាន និងអាស៊ីបូព៌ា ERIA នៃប្រទេសជប៉ុន ។

ហត្ថលេខី នៃពិធីចុះហត្ថលេខានេះ រួមមានរវាងឯកឧត្តម កិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្រ្តី រដ្ឋមន្រ្តី ក្រសួង ឧស្សាហកម្ម វិ ទ្យាសាស្ត្រ បច្ចេកវិទ្យា និងនវានុវត្តន៍ ជាមួយ ឯកឧត្ដម HAMANO Koichi ស្នងការ នៃអង្គភាព JPO ជប៉ុន ចូលរួម តាម ប្រព័ន្ធ អនឡាញ ពីប្រទេសជប៉ុន និងឯកឧត្តម សាស្ត្រាចារ្យ Hidetoshi Nishimura ប្រធានវិទ្យាស្ថាន ERIA ជប៉ុន ចូលរួមដោយផ្ទាល់នៅទីស្តីការក្រសួង ។

មានប្រសាសន៍ ថ្លែង នា ឱកាស នោះ ឯកឧត្ដម កិត្តិសេដ្ឋាបណ្ឌិត ទេសរដ្ឋមន្រ្តី ចម ប្រសិទ្ធ ឯកឧត្ដម HAMANO Koichi ស្នងការ នៃអង្គភាព JPO និងឯកឧត្តម សាស្ត្រាចារ្យ Hidetoshi Nishimura ប្រធាន វិទ្យាស្ថាន ERIA ជប៉ុន បាន សម្ដែង នូវ ទឹកចិត្ត រីករាយ អបអរសាទរ ចំពោះ សមិទ្ធផល លេចចេញនាថ្ងៃនេះ ដែលជាការចុះហត្ថលេខាដ៏មានសារ: សំខាន់ក្នុងលក្ខណ:ត្រីភាគី សម្រាប់ លេីកកំពស់វិស័យកម្មសិទ្ធិបញ្ញា និងការបណ្តុះបណ្តាល បច្ចេក ទេសទាំងផ្នែករដ្ឋ និងឯកជ ន ដេីម្បី ជុំរុញ ការ យល់ដឹង និងចំណេះជំនាញផ្នែកកម្មសិទ្ធិបញ្ញា នៅកម្ពុជា ។

នៅក្នុងអនុស្សរណៈនៃកិច្ចសហប្រតិបត្តិការនេះ ក្រសួង អង្គភាព JPO និងវិទ្យាស្ថាន ERIA ជប៉ុនបានព្រមព្រៀងគ្នាក្នុងការផ្តល់ការគាំទ្រផ្នែកបច្ចេក ទេស ដែលរួមមានការស្រាវជ្រាវលើវិស័យកម្មសិទ្ធិបញ្ញា ការប្រព្រឹត្តិកម្មរួមគ្នានៃព្រឹត្តិការណ៍បច្ចេកទេសដូចជា សិក្ខាសាលា ការបង្រៀន និងសិក្ខាសាលា ការចែករំលែកចំណេះដឹង និងការលើកកម្ពស់ការផ្ទេរបច្ចេកវិទ្យា។ ការផ្សព្វផ្សាយសមិទ្ធិផលនៃការស្រាវជ្រាវ ការសម្របសម្រួលនៃការផ្លាស់ប្តូរទស្សនកិច្ច ការផ្លាស់ប្តូរព័ត៌មាន និងការអនុវត្តល្អបំផុតលើគោល នយោបាយ ច្បាប់ និងបទប្បញ្ញត្តិទាក់ទងនឹងសិទ្ធិកម្មសិទ្ធិបញ្ញា និងទម្រង់ផ្សេងទៀតនៃកិច្ចសហប្រតិបត្តិការដែលបានព្រមព្រៀងគ្នាទៅវិញទៅមកក្នុងវិស័យកម្មសិទ្ធិបញ្ញា។

ក្នុងឱកាសនោះ ឯកឧត្ដម កិត្តិសេដ្ឋាបណ្ឌិត ទេសរដ្ឋមន្រ្តី ចម ប្រសិទ្ធ បានលើកទឹកចិត្តបុគ្គលិកបច្ចេក ទេសរបស់យើងឱ្យបន្តពិភាក្សាក្នុងកិច្ចសហប្រតិបត្តិការសម្រាប់ការអនុវត្តគម្រោងនេះ និងបង្កើតសកម្ម ភាពបន្ថែមទៀត និងការពង្រឹងកិច្ចសហប្រតិបត្តិការរវាង MISTI និង JPO និង ERIA ។ ហេីយ ឯកឧត្ដម កិត្តិសេដ្ឋាបណ្ឌិត ទេសរដ្ឋមន្រ្តី ក៏បានរំលេចផងដែរថា៖ក្រៅពីកិច្ចសហប្រតិបត្តិការរបស់យើងជាមួយការិយាល័យប្រកាសនីយបត្រតក្កកម្មជប៉ុន (JPO)

ក្រសួងក៏បានធ្វើកិច្ចសហប្រតិបត្តិការលេីវិស័យកម្មសិទ្ធិបញ្ញា( IP )ជាមួយការិយាល័យ IP សំខាន់ៗមួយចំនួននៅលើពិភពលោក ដូចជាការិយាល័យកម្មសិទ្ធិបញ្ញានៃប្រទេសសិង្ហបុរី (IPOS) -ការិយាល័យ ប្រកាស នីយបត្រតក្កកម្មអឺរ៉ុប(EPO) រដ្ឋបាលកម្មសិទ្ធិបញ្ញាជាតិចិន (CNIPA) ការិយាល័យកម្មសិទ្ធិបញ្ញាកូរ៉េ (KIPO) និងការិយាល័យប្រកាសនីយបត្រតក្កកម្ម និងពាណិជ្ជសញ្ញារបស់សហរដ្ឋអាមេរិក (USPTO) ជាដេីម ។