នៅថ្ងៃទី២៧ ខែមីនា ឆ្នាំ២០២៥ ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ និង វិទ្យាស្ថាន Lotus Academy បានចុះហត្ថលេខាលើអនុស្សរណៈនៃការយោគយល់ ដើម្បីលើកម្ពស់ការអប់រំ និងបណ្តុះបណ្តាលផ្នែកបច្ចេកវិទ្យា និងរួមចំណែកអភិវឌ្ឍកម្លាំងពលកម្មនៅកម្ពុជា។ ពិធី​ចុះអនុស្សរណៈនេះ​ត្រូវបានធ្វើឡើងក្រោមអធិបតីភាព ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ   បច្ចេកវិទ្យា និងនវានុវត្តន៍។

កិច្ចសហការនេះមានគោលដៅបំពាក់ជំនាញអនាគត (future-ready skills) ដល់កម្លាំងពលកម្មកម្ពុជា តាមរយៈការបង្កើនជំនាញ ការចាប់យកជំនាញថ្មី និងកម្មវិធីបណ្តុះបណ្តាលដែលផ្តោតលើនវានុវត្តន៍ ដោយគាំទ្រគោលនយោបាយអាទិភាពជាតិនានា រួមទាំងផែនទីបង្ហាញផ្លូវវិទ្យាសាស្ត្រ បច្ចេកវិទ្យា និងនវានុវត្តន៍កម្ពុជា២០៣០ និងរបៀបវារៈស្រាវជ្រាវជាតិ២០២៥។

ឯកឧត្តម បណ្ឌិត ទ្រី សុផល អគ្គនាយកនៃអគ្គនាយកដ្ឋានវិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងថា៖ "ភាពជាដៃគូនេះឆ្លុះបញ្ចាំងពីការប្តេជ្ញាចិត្តរបស់យើង ក្នុងការត្រៀមកម្លាំងពលកម្មរបស់ កម្ពុជាសម្រាប់សេដ្ឋកិច្ចឌីជីថល។ ការបណ្តុះបណ្តាលប្រកបដោយគុណភាពខ្ពស់ និងស្របតាមតម្រូវការឧស្សាហកម្មនឹងលើកកម្ពស់ប្រព័ន្ធអេកូឡូស៊ីនវានុវត្តន៍របស់យើង ព្រមទាំងរួមចំណែកដល់ការអភិវឌ្ឍប្រទេសជាតិ។”

លោក Andy Ng តំណាង Lotus Academy បានលើកឡើងថា៖ "កម្មវិធីបណ្តុះបណ្តាលរបស់យើងលើជំនាញបញ្ញាសិប្បនិម្មិត សុវត្ថិភាពបច្ចេកវិទ្យា Blockchain ការវិភាគទិន្នន័យ បច្ចេកវិទ្យាហិរញ្ញវត្ថុ បច្ចេកវិទ្យាបៃតង និងមុខជំនាញផ្សេងៗទៀត នឹងជំរុញឱ្យកម្លាំងពលកម្មរបស់យើងរីកចម្រើន នៅក្នុងស្ថានភាពនៃការវិវឌ្ឍជឿនលឿនផ្នែកបច្ចេកវិទ្យាយ៉ាងឆាប់រហ័ស។”

ក្រោមអនុស្សរណៈនៃការយោគយល់នេះ វិទ្យាស្ថាន Lotus Academy នឹងផ្តល់ជូននូវកម្មវិធីបណ្តុះបណ្តាល និងវិញ្ញាបនបត្រដែលទទួលស្គាល់ជាអន្តរជាតិ ដែលដឹកនាំ និងបណ្តុះបណ្តាលដោយអ្នកជំនាញក្នុងឧស្សាហកម្មផ្ទាល់។ គំនិតផ្តួចផ្តើមផ្សេងៗទៀត ដូចជាសិក្ខាសាលា និងកម្មវិធីចែករំលែកចំណេះដឹង នឹងចូលរួមកាត់បន្ថយគម្លាតជំនាញ ព្រមទាំងគាំទ្រដល់មហិច្ឆតានៃវិស័យវិទ្យាសាស្ត្រ បច្ចេកវិទ្យា និងនវានុវត្តន៍របស់កម្ពុជា។

លោក Andy Ng បានលើកឡើងថា៖ "ការអភិវឌ្ឍកម្លាំងពលកម្មគឺជាដំណើរជាបន្តបន្ទាប់។ តាមរយៈ​ការកៀរគរការ​ចូលរួម​រយៈពេល​វែង យើង​មាន​បំណង​កសាង​កម្លាំង​ពលកម្ម​ដែល​មាន​ភាព​ធន់ និងមានភាព​ប្រកួត​ប្រជែងខ្ពស់ ​ដើម្បី​ជំរុញ​​កម្ពុជា​ឆ្ពោះ​ទៅ​រក​សេដ្ឋកិច្ច​ដែល​ផ្អែក​លើ​ចំណេះដឹង។”