ភ្នំពេញ ថ្ងៃទី២៥ ខែវិច្ឆិកា ឆ្នាំ២០២៤ – កម្មវិធីពានរង្វាន់សហគ្រិនខ្មែរ ឆ្នាំ២០២៤ បានជ្រើសរើសជ័យលាភី ជាក្រុមហ៊ុន និងក្រុមប្រកួត ដែលបានបង្ហាញនវានុវត្តន៍ និងការរួមចំណែកដល់ប្រព័ន្ធអេកូឡូស៊ីសហគ្រិនភាពរបស់កម្ពុជា។ កម្មវិធីនេះត្រូវបានធ្វើឡើងក្រោមអធិបតីភាព ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជាប្រធានក្រុមប្រឹក្សាបរធនបាលនៃសហគ្រិនខ្មែរ ដោយបិទបញ្ចប់ការប្រកួតប្រជែងរយៈពេលពេញមួយឆ្នាំ ក្នុងចំណោមបេក្ខជនចូលរួមជិត ២.០០០ ក្រុម និងក្រុមហ៊ុន។

ឯកឧត្តម ហែម វណ្ណឌី បានកោតសរសើរដល់ជ័យលាភីទាំងអស់ និងបានលើកទឹកចិត្តអ្នកចូលរួមប្រកួត ឱ្យខិតខំបន្តអភិវឌ្ឍសមត្ថភាពបន្ថែម ដើម្បីចាប់យកឧត្តមភាព។ ឯកឧត្តមបានលើកឡើងថា៖​ "ភាពជោគ​ជ័យមិនមែនស្ថិតនៅលើពានរង្វាន់នារាត្រីនេះតែមួយមុខទេ។ សហគ្រិនគួរមានភាពក្លាហាន ហ៊ានចូលរួមប្រកួតប្រជែង សាកល្បងសមត្ថភាព ទទួលយកចំណេះដឹងថ្មីៗ និងប្រែក្លាយឧបសគ្គជាឱកាស​​ដើម្បី​ភាពជោគជ័យនាពេលខាងមុខ។”

ពានរង្វាន់សហគ្រិនខ្មែរ ឆ្នាំ២០២៤ មានបួនប្រភេទគឺ៖ ពានរង្វាន់សហគ្រិនកម្រិតវិទ្យាល័យ​, ពានរង្វាន់សហគ្រិនមហាវិទ្យាល័យ, ពានរង្វាន់ធុរកិច្ចថ្មី​, និង​ពានរង្វាន់សហគ្រាសធុនតូច និងមធ្យម។ ពានរង្វាន់ទាំងនេះឆ្លុះបញ្ចាំងពីតួអង្គសំខាន់ៗនៃសហគ្រិនភាពដែលកំពុងរីកចម្រើនរបស់កម្ពុជា។ ជ័យលាភីត្រូវបានទទួលស្គាល់ចំពោះភាពច្នៃប្រឌិត ភាពធន់ និងការខិតខំប្រឹងប្រែងក្នុងការជំរុញនវានុវត្តន៍ និងកំណើនសេដ្ឋកិច្ច។

ឯកឧត្តមបណ្ឌិត ឈៀង វណ្ណមុនិណ្ឌ ប្រតិភូរាជរដ្ឋាភិបាល ទទួលបន្ទុកជានាយកប្រតិបត្តិសហគ្រិនខ្មែរ បានលើកឡើងថា៖ “កម្មវិធីពានរង្វាន់សហគ្រិនខ្មែរ ឆ្នាំ២០២៤ បង្ហាញពីការយកចិត្តទុកដាក់របស់រាជរដ្ឋា​ភិបាលកម្ពុជា ក្នុងការលើកកម្ពស់នវានុវត្តន៍ និងកសាងប្រព័ន្ធអេកូឡូស៊ីសហគ្រិនភាពជាតិមួយ ដែលពូនជ្រុំគំនិតឱ្យរីកចម្រើន និងបណ្តុះធុរកិច្ចឱ្យរីកលូតលាស់។”

ជ័យលាភីពានរង្វាន់សហគ្រិនខ្មែរ ឆ្នាំ២០២៤ រួមមាន៖

ពានរង្វាន់សហគ្រាសធុនតូច និងមធ្យម

• ·      ជ័យលាភីពានរង្វាន់សហគ្រាសធុនតូចនិងមធ្យម ឆ្នាំ២០២៤៖ ជ័យលាភីសហគ្រាសធុនតូច និងមធ្យម  PPF Yummy Manucaturing ទទួលបានពាន និងទឹកប្រាក់​​ ២៨.០០០.០០០ រៀល (៧.០០០ដុល្លារ)
• ·      ជ័យលាភីពានរង្វាន់សហគ្រាសធុនតូចនិងមធ្យម ផ្នែកនវានុវត្តន៍៖ ក្រុមហ៊ុន La Fattoria ទទួលបានពាន និងទឹកប្រាក់ ២៨.០០០.០០០ រៀល (៧.០០០ដុល្លារ)
• ·      ជ័យលាភីពានរង្វាន់សហគ្រាសធុនតូចនិងមធ្យម ផ្នែកនាំចេញ៖ ក្រុមហ៊ុន Khmer Green Charcoal Co. Ltd ទទួលបានពាន រង្វាន់ និងទឹកប្រាក់ ២៨.០០០.០០០ រៀល (៧.០០០ដុល្លារ)
• ·      ជ័យលាភីពានរង្វាន់សហគ្រាសធុនតូចនិងមធ្យម ផ្នែក​សង្គម​៖  ក្រុមហ៊ុន Cambodian Standard Development & Supply Co Ltd ទទួលបានពាន រង្វាន់ និងទឹកប្រាក់ ២៨.០០០.០០០ រៀល (៧.០០០ដុល្លារ)

ពានរង្វាន់ធុរកិច្ចថ្មី 

• ·      ជ័យលាភីពានរង្វាន់ធុរកិច្ចថ្មី ឆ្នាំ២០២៤​ ៖ ក្រុមហ៊ុន Anon (Cambodia) CO.Ltd ទទួលបានពាន និងទឹកប្រាក់ ២0.000.000 រៀល (៥.000 ដុល្លារ)
• ·      ជ័យលាភីពានរង្វាន់ធុរកិច្ចថ្មី ផ្នែកនវានុវត្តន៍៖  ក្រុមហ៊ុន JMLH Enterprise ទទួលបានពាន និងទឹកប្រាក់ ២0.000.000 រៀល (៥.000 ដុល្លារ)
• ·      ជ័យលាភីពានរង្វាន់​ធុរកិច្ចថ្មី​ ផ្នែកបច្ចេកវិទ្យា៖ ក្រុមហ៊ុន WORKINGNA ទទួលបានពាន និងទឹកប្រាក់ ២0.000.000 រៀល (៥,000 ដុល្លារ)
• ·      ជ័យលាភីពានរង្វាន់​​ធុរកិច្ចថ្មី​ ផ្នែកសង្គម៖ ក្រុមហ៊ុន Chenda Khmer Recycle Co. LTD ទទួលបានពាន និងទឹកប្រាក់ ២0.000.000 រៀល (៥.000 ដុល្លារ)

ពានរង្វាន់​​​សហគ្រិនមហាវិទ្យាល័យ​​

• - ពានរង្វាន់សហគ្រិនមហាវិទ្យាល័យ ជ័យលាភីលេខ១៖ ក្រុម ECO Craft ទទួលបានពាន និងទឹកប្រាក់ ១៦.០០០.០០០ រៀល (៤.០០០ ដុល្លារ)
• - ពានរង្វាន់​​​សហគ្រិនមហាវិទ្យាល័យ​ ជ័យលាភីលេខ២៖ ក្រុម INNO BOXទទួលបានពាន និងទឹកប្រាក់ ១២.០០០.០០០ រៀល (៣.០០០ ដុល្លារ)
•  - ពានរង្វាន់សហគ្រិនមហាវិទ្យាល័យ​ ជ័យលាភីលេខ៣៖ ក្រុម ZAZAR security ទទួលបានពាន និងទឹកប្រាក់ ៨.០០០.០០០ រៀល (២.០០០ ដុល្លារ)

ពានរង្វាន់សហគ្រិនកម្រិតវិទ្យាល័យ

• - ជ័យលាភីពានរង្វាន់សហគ្រិន​​​កម្រិតវិទ្យាល័យ​ ផ្នែកនវានុវត្តន៍ ៖ ក្រុម Power of Griffins ទទួលបានពាន និងទឹកប្រាក់ ៨.០០០.០០០​ រៀល (២.០០០ ដុល្លារ)
• - ជ័យលាភីពាន​រង្វាន់​សហគ្រិនកម្រិតវិទ្យាល័យ​ ផ្នែកធុរកិច្ចប្រកបដោយចីរភាព៖ ក្រុម UNLIMITED ទទួលបានពាន និងទឹកប្រាក់ ៨.០០០.០០០​ រៀល (២.០០០ ដុល្លារ)
• - ជ័យលាភីពាន​រង្វាន់​សហគ្រិន​​​កម្រិតវិទ្យាល័យ​ ផ្នែកសង្គម​ ៖ ក្រុម 3in1 ទទួលបានពាន និងទឹកប្រាក់ ៨.០០០.០០០ រៀល​ (២.០០០ ដុល្លារ) 

កម្មវិធីពានរង្វាន់សហគ្រិនខ្មែរ ឆ្នាំ២០២៤  ដែលឈានចូលដល់ឆ្នាំទីប្រាំនេះ បង្ហាញពីបេសកកម្មរបស់សហគ្រិនខ្មែរ ក្នុងការថែបំប៉នប្រព័ន្ធអេកូឡូស៊ីសហគ្រិនភាពនៅកម្ពុជា។ កម្មវិធីនេះផ្តល់ឱកាសសម្រាប់ការបណ្តុះបណ្តាល ការកសាងបណ្តាញធុរកិច្ច និងការចូលរួមក្នុងការប្រកួតប្រជែងថ្នាក់ជាតិ និងអន្តរជាតិ ក្នុងគោលដៅជំរុញកំណើនអាជីវកម្មនៅគ្រប់កម្រិត។