ក្រសួងឧស្សាហកម្ម និងវិទ្យាស្ថានកំណើនបៃតងសកល ជំរុញការអភិវឌ្ឍឧស្សាហកម្មបៃតងនៅកម្ពុជា

ព័ត៌មាន និងព្រឹត្តិការណ៍ ថ្ងៃព្រហស្បតិ៍, ទី03 ខែ មេសា ឆ្នាំ 2025

នៅថ្ងៃទី២ ខែមេសា ឆ្នាំ២០២៥ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានទទួលជួបគណៈប្រតិភូមកពីវិទ្យាស្ថានកំណើនបៃតងសកល (GGGI) ដឹកនាំដោយលោកស្រី Shomi Kim នាយកប្រចាំប្រទេស ដើម្បីពិភាក្សាអំពីការជំរុញគំនិតផ្តួចផ្តើមឧស្សាហកម្មបៃតងនៅកម្ពុជា។

ឯកឧត្តម ហែម វណ្ណឌី បានកោតសរសើរវិទ្យាស្ថាន GGGI ដែលបានរួមចំណែកលើកកម្ពស់ប្រសិទ្ធភាពថាមពលក្នុងវិស័យកាត់ដេរ ស្បែកជើង និងទំនិញធ្វើដំណើរ។ ឯកឧត្តម​បាន​សង្កត់​ធ្ងន់​លើ​តុល្យភាព​រវាង​ការ​ធ្វើ​ឱ្យឧស្សាហកម្ម​​កម្ពុជាកាន់តែ​​បៃតង និង​ការ​លើក​កម្ពស់​ភាពប្រកួត​ប្រជែង​នៃ​ឧស្សាហកម្មទាំងនោះ។

ឯកឧត្តមរដ្ឋមន្ត្រីបានលើកទឹកចិត្តឱ្យ GGGI ពង្រីក និងចែករំលែកភាពជោគជ័យនៃកំណើនបៃតង បន្ថែមពីលើប្រសិទ្ធភាពថាមពល ដូចជាការប្រើប្រាស់ទឹក និងការគ្រប់គ្រងកាកសំណល់របស់រោងចក្រជាដើម។ ឯកឧត្តមក៏បានស្នើឱ្យ GGGI ផ្តល់ការគាំទ្រក្នុងការរៀបចំគោលការណ៍ណែនាំស្តីពីការបង្កើតសួនអេកូឧស្សាហកម្ម សម្រាប់ជាគំរូនៃការអភិវឌ្ឍឧស្សាហកម្មប្រកបដោយនិរន្តរភាព។

លោកស្រី Shomi Kim បានបង្ហាញការប្តេជ្ញាចិត្តរបស់ GGGI ក្នុងការគាំទ្រកំណើនបៃតងរបស់កម្ពុជា តាមរយៈគម្រោងឧស្សាហកម្មបៃតង និងគម្រោងធុរកិច្ចដែលប្រើបច្ចេកវិទ្យាមេត្រីភាពអាកាសធាតុ។ លោកស្រីបានលើកឡើងពីកិច្ចសហការរវាង GGGI និងក្រសួង-ស្ថាប័នរដ្ឋនានា ព្រមទាំងកិច្ចខិតខំប្រឹងប្រែងក្នុងការកៀរគរហិរញ្ញប្បទានបៃតង។

លោកស្រីបានបន្ថែមថា មូលនិធិអាកាសធាតុបៃតង (GCF) បានកៀរគរមូលនិធិប្រមាណ ២២០ លានដុល្លារ សម្រាប់ផ្តល់ហិរញ្ញប្បទានដល់ក្រុមហ៊ុននៅក្នុងប្រទេសអាស៊ានចំនួន ៥ រួមទាំងកម្ពុជា ដើម្បីឱ្យក្រុមហ៊ុនទាំងនោះអនុវត្តដំណោះស្រាយបៃតងក្នុងខ្សែច្រវាក់ផលិតកម្មរបស់ខ្លួន។ លោកស្រីក៏បានលើកឡើងពីការងារដែល GGGI កំពុងអនុវត្ត ដើម្បីផ្សារភ្ជាប់សហគ្រាសធុនតូចនិងមធ្យមក្នុងស្រុក ជាមួយក្រុមហ៊ុនសកល លើការជួញដូរឥណទានកាបូន។

ឯកឧត្តម ហែម វណ្ណឌី បានស្នើឱ្យវិទ្យាស្ថាន GGGI និង មូលនិធិ GCF ដើរតួជាសំឡេងតំណាងឱ្យប្រទេសដែលមានសេដ្ឋកិច្ចតូច ដោយតស៊ូមតិលើការអនុវត្តគោលការណ៍បៃតងប្រកបដោយសមធម៌  និងយុត្តិធម៌ ជាពិសេសសម្រាប់ប្រទេសដែលមានសេដ្ឋកិច្ចតូច និងសមត្ថភាពអនុលោមភាពនៅមានកម្រិត។ ឯកឧត្តមក៏បានជំរុញឱ្យមូលនិធិ GCF ពង្រីកគម្រោងហិរញ្ញប្បទានសម្រាប់សហគ្រាសក្នុងស្រុកអនុវត្តបច្ចេកវិទ្យា និងដំណោះស្រាបៃតង។

អ្នកស្រី Shomi Kim បានលើកឡើងថា វិទ្យាស្ថាន GGGI បាននិងកំពុងគាំទ្រក្រុមហ៊ុនក្នុងស្រុក ក្នុងការបោះផ្សាយមូលបត្របំណុលបៃតង និងគាំទ្រធនាគារក្នុងស្រុកឱ្យទទួលបានការវាយតម្លៃទទួលស្គាល់ពីមូលនិធិ GCF សម្រាប់ការផ្តល់ហិរញ្ញប្បទានបៃតង។

ដោយ: ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍

ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍

location_on ៤៥ មហាវិថីព្រះនរោត្តម សង្កាត់ផ្សារថ្មី៣ ខណ្ឌដូនពេញ រាជធានីភ្នំពេញ, ១២០២០៣

© 2024 រក្សាសិទ្ធិគ្រប់យ៉ាងដោយ ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍

    • telegram
    • tiktok
    • instagram
    • chatbot
    គោលការណ៍​ឯកជនភាព