ឯកឧត្តម ដាវ អានសាន រដ្ឋលេខាធិការ បានថ្លែងថា អាណត្តិកិច្ចជារួមមួយរបស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ គឺបង្កើនតម្លៃបន្ថែម ចូលរួមក្នុងកំណើនសេដ្ឋកិច្ច ជាមួយនឹងផលិតផលកម្ពុជា កាន់តែមានស្តង់ដារ មានគុណភាពនិងទទួលបានចំណែកទីផ្សារច្រើន ទាំងក្នុងនិងក្រៅប្រទេស។ 

ជាក់ស្តែង ក្រសួងកំពុងយកចិត្តទុកដាក់ផ្តល់សេវាគាំទ្រនានា រួមទាំងការផ្គត់ផ្គង់ទឹកស្អាត ការបង្កើនបរិយាកាសមេត្រីភាពអាជីវកម្ម និងជួយសម្របសម្រួលផលិតករ សហគ្រិន និងឧស្សាហករនៅកម្ពុជា ឱ្យយកចិត្តទុកដាក់ទៅលើការចាប់យកភាពអនុលោម និងគុណភាពផលិតផល ដើម្បីពង្រឹង-ពង្រីកសមត្ថភាពប្រកួតប្រជែង។ ឯកឧត្តមក៏បានចែករំលែកព័ត៌មានអំពីអាទិភាពយុទ្ធសាស្ត្ររបស់រាជរដ្ឋាភិបាលកម្ពុជាមួយផ្នែក ដែលស្ថិតក្រោមអាណត្តិកិច្ចរបស់ក្រសួងឧស្សាហកម្ម វ.ប.ន. ផងដែរ។

ឯកឧត្តមរដ្ឋលេខាធិការ បានថ្លែងបញ្ជាក់បែបនេះ ក្នុងឱកាសតំណាងក្រសួង ឧ.វ.ប.ន. ដើម្បីចែករំលែកព័ត៌មានស្តីពី បច្ចុប្បន្នភាពគោលនយោបាយសេដ្ឋកិច្ច សម្រាប់មន្ត្រីការទូតកម្ពុជា រៀបចំដោយ ក្រសួងការបរទេស និងសហប្រតិបត្តិការអន្តរជាតិ។ 

ព្រឹកថ្ងៃទី១២ ខែវិច្ឆិកា ២០២៤
សណ្ឋាគារ Hyatt Phnom Penh