ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៏, Ministry of Industry Science Technology and Innovation

home Homechevron_right Pressroomchevron_right Press Releasechevron_right សេចក្តីប្រកាសព័ត៌មាន ស្តីពីលទ្ធផលនៃពិធីផ្សព្វផ្សាយ និងដាក់ឱ្យប្រើប្រាស់ជាផ្លូវការ «ផែនទីបង្ហាញផ្លូវ វិទ្យាសាស្ត្រ បច្ចេកវិទ្យា និងនវានុវត្តន៍ កម្ពុជា ២០៣០»

សេចក្តីប្រកាសព័ត៌មាន ស្តីពីលទ្ធផលនៃពិធីផ្សព្វផ្សាយ និងដាក់ឱ្យប្រើប្រាស់ជាផ្លូវការ «ផែនទីបង្ហាញផ្លូវ វិទ្យាសាស្ត្រ បច្ចេកវិទ្យា និងនវានុវត្តន៍ កម្ពុជា ២០៣០»

Press Release Thursday, 19 August 2021

រាជធានីភ្នំពេញ ថ្ងៃទី១៩ សីហា ២០២១ - ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ (ឧ.វ.ប.ន.) បានរៀបចំពិធីផ្សព្វផ្សាយ និងដាក់ឱ្យប្រើប្រាស់ជាផ្លូវការ “ ផែនទីបង្ហាញផ្លូវ វិទ្យាសាស្រ្ត បច្ចេកវិទ្យា និងនវានុវត្តន៍(វ.ប.ន. ) កម្ពុជា២០៣០” តាមប្រព័ន្ធវីដេអូ ក្រោមអធិបតីភាពដ៏ខ្ពង់ខ្ពស់របស់ ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួង ឧ.វ.ប.ន. និង លោកជំទាវ Armida Salsiah Alisjahbana អគ្គលេខាធិការរង អង្គការសហប្រជាជាតិ និងជាលេខាប្រតិបត្តិនៃគណៈកម្មការសេដ្ឋកិច្ច និងសង្គមប្រចាំតំបន់អាស៊ីប៉ាស៊ីហ្វិច (ESCAP) ដោយមានការចូលរួមពី ឯកឧត្តម លោកជំទាវ អ្នកឱកញ៉ា លោក លោកស្រី មកពីក្រុមប្រឹក្សាជាតិវិទ្យាសាស្រ្ត បច្ចេកវិទ្យា និងនវានុវត្តន៍ ក្រសួង-ស្ថាប័ន សាកលវិទ្យាល័យ មជ្ឈមណ្ឌលស្រាវជ្រាវ វិស័យឯកជន និងដៃគូអភិវឌ្ឍន៍ សរុបប្រមាណ៣៣០រូប ។

លោកជំទាវ Armida Salsiah Alisjahbana បានសាទរ ការដាក់ឱ្យប្រើប្រាស់ ផែនទីបង្ហាញផ្លូវ វ.ប.ន. កម្ពុជា ២០៣០ និងបានលើកឡើងថា ផែនទីបង្ហាញផ្លូវនេះជាមគ្គទ្ទេសក៍ដល់មន្រ្តីរាជរដ្ឋាភិបាល និងតួអង្គពាក់ព័ន្ធសំខាន់ៗផ្សេងទៀតអំពីសកម្មភាពសំខាន់ៗដែលជាតម្រូវការចាំបាច់ដើម្បីពង្រឹងសមត្ថភាព វ.ប.ន. ជាតិ។ លោកជំទាវ បានមានប្រសាសន៍ពីសក្តានុពល វ.ប.ន. ដើម្បីសម្រចគោលដៅអភិវឌ្ឍន៍ប្រកបដោយចីរភាព និងបរិយាប័ន្ន និងបន្ថែមទៀតថា ការអនុវត្តគោលនយោបាយបានជោគជ័យ លុះត្រាតែមានការចូលរួមយ៉ាងសកម្ម ពីតួអង្គពាក់ព័ន្ធដូចជាស្ថាប័នអប់រំ និងស្រាវជ្រាវ វិស័យឯកជន ធុរកិច្ចថ្មី និងដៃគូអភិវឌ្ឍន៍។

នៅក្នុងសុន្ទរកថាបើកអង្គពិធីនេះ ឯកឧត្តម ទេសរដ្ឋមន្ត្រី បានវាយតម្លៃខ្ពស់លើកិច្ចខិតខំប្រឹងប្រែងរបស់ អគ្គនាយកដ្ឋាន វ.ប.ន. ដែលបានកសាង ផែនទីបង្ហាញផ្លូវ វ.ប.ន. កម្ពុជា ២០៣០ ក្រោមការគាំទ្រប្រឹក្សាយោបល់ពី ESCAP និងការចូលរួមចំណែកពីស្ថាប័នពាក់ព័ន្ធក្នុងដំណើរការកសាងឯកសារយុទ្ធសាស្រ្តសម្រាប់ព្រះរាជាណាចក្រកម្ពុជានេះឡើង។ ឯកឧត្តម ទេសរដ្ឋមន្ត្រី បានគូសបញ្ជាក់ពីសារៈសំខាន់នៃវិស័យ វ.ប.ន. ដែលជាកម្លាំងចលករ និងជាពិសេសជាក្បាលម៉ាស៊ីននៃការអភិវឌ្ឍជាតិ។ ឯកឧត្តម ទេសរដ្ឋមន្ត្រី បានលើកឡើងថា ផែនទីបង្ហាញផ្លូវ វ.ប.ន. កម្ពុជា ២០៣០ ជាឯកសារគោលនយោបាយយុទ្ធសាស្រ្តដ៏មានសារៈសំខាន់ក្នុងការជួយតម្រង់ទិសក្រសួង-ស្ថាប័នក្នុងការអនុវត្តគោលនយោបាយ ក្រោមការសម្របសម្រួលពីក្រសួង ឧ.វ.ប.ន. និងដើម្បីសម្រេចបានចក្ខុវិស័យរាជរដ្ឋាភិបាលក្នុងការប្រែក្លាយទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងមានចំណូលខ្ពស់នៅឆ្នាំ២០៥០ តួអង្គពាក់ព័ន្ធនានាត្រូវតែឆ្លើយតបឱ្យទាន់សភាពការណ៍ និងធ្វើការរួមគ្នាក្នុងការអនុវត្តផែនទីបង្ហាញផ្លូវ វ.ប.ន. នេះឱ្យមានប្រសិទ្ធិភាពខ្ពស់។

ជាចុងបញ្ចាប់ ឯកឧត្តម ទេសរដ្ឋមន្ត្រី បានថ្លែងអំណរគុណដល់តំណាងក្រសួង-ស្ថាប័ន សាកលវិទ្យាល័យ គ្រឹះស្ថានស្រាវជ្រាវ វិស័យឯកជន ដៃគូអភិវឌ្ឍ និងជាពិសេសដល់ លោកជំទាវ Armida Salsiah Alisjahbana អគ្គលេខាធិការរង នៃអង្គការសហប្រជាជាតិ និងជាលេខាធិការប្រតិបត្តិនៃ ESCAP និងប្រកាសដាក់ឱ្យប្រើប្រាស់ជាផ្លូវការនូវ ផែនទីបង្ហាញផ្លូវ វ.ប.ន. កម្ពុជា ២០៣០ នេះ។

ជាមួយគ្នានេះដែរ ឯកឧត្តមបណ្ឌិត ហ៊ុល សៀងហេង អគ្គនាយក នៃអគ្គនាយកដ្ឋាន វ.ប.ន. បានធ្វើបទបង្ហាញពីសាវតានៃផែនទីបង្ហាញផ្លូវ វ.ប.ន. កម្ពុជា ២០៣០ និងលោកបណ្ឌិត ស្រ៊ុន បញ្ញារិទ្ឋិប្រធាននាយកដ្ឋានគោលនយោបាយ វ.ប.ន. បានធ្វើបទបង្ហាញលម្អិតពីសសរស្តម្ភទាំង ៥ រួមមាន៖ ១.អភិបាលកិច្ច ២.ការអប់រំ ៣.ការស្រាវជ្រាវ ៤.កិច្ចសហការ និង៥.ប្រព័ន្ធអេកូឡូស៊ី ព្រមទាំងគោលដៅគោលនយោបាយ និងលិខិតូបករណ៍ក្នុងផែនទីបង្ហាញផ្លូវ វ.ប.ន. កម្ពុជា ២០៣០ ។

ថ្ងៃព្រហស្បតិ៍ ១១កើត ខែស្រាពណ៍ ឆ្នាំឆ្លូវ ត្រីស័ក ព.ស. ២៥៦៥

រាជធានីភ្នំពេញ ថ្ងៃទី ១៩ ខែសីហា ឆ្នាំ២០២១

ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍

By: អគ្គនាយកដ្ឋានវិទ្យាសាស្ត្រ បច្ចេកវិទ្យា និងនវានុវត្តន៍

Related news

External links

Asean Access

Khmer SME

National Assembly of the Kingdom of Cambodia

About Us

Contact