កិច្ចសហប្រតិបត្តិការអន្តរស្ថាប័នបានដោះស្រាយវិបត្តិទឹកនៅស្រុកមោងឫស្សី

មន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងមន្ទីរធនធានទឹក និងឧតុនិយម ខេត្តបាត់ដំបង រួមទាំងរដ្ឋបាលស្រុក និងប្រតិបត្តិករទឹកស្អាតឯកជន បានសហការដោះស្រាយបញ្ហាខ្វះទឹកស្អាតប្រើប្រាស់នៅក្នុងឃុំគារ ស្រុកមោងឫស្សី ដែលបានប៉ះពាល់ដល់ប្រជាពលរដ្ឋប្រមាណ៤ពាន់គ្រួសារ។

មន្ត្រីនៃមន្ទីរទាំងពីរបានចុះពិនិត្យស្ថានភាពទឹកនៅក្នុងមូលដ្ឋាននេះ កាលពីដើមខែមីនា ឆ្នាំ២០២៤ ព្រមទាំងបានសហការជាមួយរដ្ឋបាលស្រុក និងប្រតិបត្តិករទឹកស្អាតក្នុងមូលដ្ឋាន ដើម្បីស្វែងរកដំណោះស្រាយជូនប្រជាពលរដ្ឋ។

ក្រុមចម្រុះនេះបានចុះពិនិត្យប្រភពទឹកក្នុងស្ទឹងដូនទ្រីដែលបានរីងស្ងួត។ ដោយពិនិត្យឃើញភាពបន្ទាន់នៃស្ថានភាពនេះ ក្រុមការងារបានស្នើសុំបើកទឹកពីទំនប់ពហុបំណងសេកសកនៃស្ទឹងសង្កែ និងបានចុះពិនិត្យប្រឡាយនាំទឹកពីទំនប់ពហុបំណងសេកសកដល់ស្ទឹងដូនទ្រី ដែលមានចម្ងាយប្រមាណ១០០គីឡូម៉ែត្រ។

តាមរយៈភាពជាដៃគូរវាងមន្ទីរទាំងពីរ អាជ្ញាធរដែនដី និងវិស័យឯកជន បញ្ហាខ្វះទឹកនេះត្រូវបានដោះស្រាយជូនប្រជាពលរដ្ឋ។ បច្ចុប្បន្ន ទំនប់ពហុបំណងសេកសកបានផ្តល់ទឹកតាមប្រឡាយចូលមកស្ទឹងដូនទ្រី ដែលជាប្រភពទឹកចាំបាច់សម្រាប់ឱ្យស្ថានីយ៍ទឹកស្អាតរបស់លោក នួន ផាន់ណារ៉ា ផលិតទឹកស្អាតជូនប្រជាពលរដ្ឋ។

ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងថា៖ “នេះគឺជាគំរូដ៏ល្អមួយនៃកិច្ចសហប្រតិបត្តិការអន្តរស្ថាប័ន ក្នុងការដោះស្រាយតម្រូវការបន្ទាន់របស់សហគមន៍ និងបង្កើនភាពធន់ ក្នុងស្ថានភាពនៃការប្រែប្រួលអាកាសធាតុដែលបានដាក់សម្ពាធលើប្រភពទឹករបស់យើង។”