នៅថ្ងៃទី១៦ ខែកក្កដា ឆ្នាំ២០២៤ វិទ្យាស្ថានជាតិវិទ្យាសាស្ត្រ បច្ចេកវិទ្យា និងនវានុវត្តន៍  និងវិទ្យាស្ថានគរុកោសល្យបាត់ដំបងបានចុះអនុស្សរណៈយោគយល់ ដើម្បីលើកកម្ពស់ការ​អភិវឌ្ឍធនធានមនុស្សផ្នែក​វិទ្យាសាស្ត្រ បច្ចេកវិទ្យា និងនវានុវត្តន៍។ ពិធីចុះអនុស្សរណៈ​នេះ ត្រូវបានធ្វើឡើងក្រោមអធិបតីភាព ឯកឧត្តម ញឹម ខេមរា រដ្ឋលេខាធិការប្រចាំការនៃ​ក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍។

ឯកឧត្តម កែវ សុជាតិ អគ្គនាយកវិទ្យាស្ថានជាតិវិទ្យាសាស្ត្រ បច្ចេកវិទ្យា និងនវានុវត្តន៍   បានបង្ហាញចក្ខុ​វិស័យ​ប្រែក្លាយវិទ្យាស្ថាននេះឱ្យក្លាយជាមជ្ឈមណ្ឌលនវានុវត្តន៍ឈានមុខរបស់កម្ពុជានៅត្រឹមឆ្នាំ២០៣០។ ឯកឧត្តមបានបញ្ជាក់ថា វិទ្យាស្ថានជាតិវិទ្យាសាស្ត្រ បច្ចេកវិទ្យា និងនវានុវត្តន៍ ផ្តោការលើការយកចិត្តទុក​ដាក់​លើការស្រាវជ្រាវ និងអភិវឌ្ឍន៍ ក្នុងគោលដៅបង្កើតដំណោះស្រាយបច្ចេកទេស និងគាំទ្រសហគ្រាសធុនតូច និងមធ្យមឱ្យមានសមត្ថភាពប្រកួតប្រជែងនៅទីផ្សារតំបន់ និងអន្តរជាតិ។ លើសពីនេះ ឯកឧត្តម​បាន​បញ្ជាក់ពីការប្តេជ្ញាចិត្តរបស់វិទ្យាស្ថានក្នុងការអភិវឌ្ឍធនធានមនុស្ស ជាពិសេសក្នុងវិស័យស្តែម (STEM)។

វិទ្យាស្ថានគរុកោសល្យបាត់ដំបងគឺជាស្ថាប័នបណ្តុះបណ្តាលគ្រូបង្រៀន ដែលមានបេសកកម្មលើកកម្ពស់​ការស្រាវជ្រាវផ្នែកវិទ្យាសាស្ត្រ បច្ចេកវិទ្យា និងនវានុវត្តន៍ ព្រមទាំងផ្តោតលើការពង្រឹងបច្ចេកទេសបង្រៀនជំនាញស្តែម និងបរិវត្តកម្មឌីជីថល។

ឯកឧត្តម ជា រដ្ឋា នាយកវិទ្យាស្ថានគរុកោសល្យបាត់ដំបង បានលើកឡើងថា វិទ្យាស្ថានមានបំណងប្រែក្លាយជាមជ្ឈមណ្ឌលឧត្តមភាពសម្រាប់ការបរិវត្តកម្មឌីជីថល និង ប្រើប្រាស់​បច្ចេក​វិទ្យាអប់រំ ដូចជា App និង Software ដើម្បីកែលម្អវិធីសាស្រ្តបង្រៀន និងធ្វើឱ្យមេរៀនកាន់តែមានលក្ខណៈអនុវត្តជាក់ស្តែង និងមានភាពពាក់ព័ន្ធសម្រាប់គរុសិស្ស។

ភាពជាដៃគូរវាងវិទ្យាស្ថានទាំងពីរគឺជាជំហានថ្មីមួយ ឆ្ពោះទៅរកការលើកកម្ពស់ការបណ្តុះបណ្តាលជំនាញស្តែម ជំរុញវប្បធម៌នវានុវត្តន៍ និងវឌ្ឍនភាពបច្ចេកវិទ្យា។