ក្រសួងឧស្សាហកម្ម វបន និងធនាគារ វីង ពង្រឹកកិច្ចសហការក្នុងវិស័យបច្ចេកវិទ្យា និងនវានុវត្តន៍
ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានទទួលជួបគណៈ ប្រតិភូធនាគារ វីង ដឹកនាំដោយនាយកប្រតិបត្តិ លោក Manu Rajan នៅថ្ងៃទី១០ ខែកុម្ភៈ ឆ្នាំ២០២៤ និងបានពិភាក្សាអំពីកិច្ចសហប្រតិបត្តិការក្នុងវិស័យបច្ចេកវិទ្យា និងនវានុវត្តន៍។
ក្នុងជំនួបនោះ ឯកឧត្តមរដ្ឋមន្ត្រីបានកោតសរសើរចំពោះវឌ្ឍនភាពរបស់វីង ដោយលើកឡើងថា បច្ចេកវិទ្យា និងនវានុវត្តន៍ជាកត្តាសំខាន់ដែលបានជំរុញក្រុមហ៊ុនឱ្យឈានទៅសម្រេចបានសមិទ្ធផលថ្មីៗ។
លោក Manu Rajan បានស្នើឱ្យមានការពង្រឹងកិច្ចសហប្រតិបត្តិការរវាង វីង និងក្រសួង ដែលសំណើនេះត្រូវបានស្វាគមន៍ដោយឯកឧត្តមរដ្ឋមន្ត្រី។ លោកនាយកប្រតិបត្តិបានជម្រាបជូនពីសាវតារបស់ វីង ដែលចាប់ផ្តើមជាសេវា ផ្ទេរប្រាក់ក្នុងឆ្នាំ២០០៩ និងបានវិវត្តន៍ជាក្រុមហ៊ុនឈានមុខ លើបរិយាបន្នហិរញ្ញវត្ថុ និងការរីកចម្រើនផ្នែកបច្ចេកវិទ្យា។
លោកបានគូសបញ្ជាក់ថា កម្ពុជាគឺជាករណីជោគជ័យមួយ នៅក្នុងទិដ្ឋភាពបរិយាបន្នហិរញ្ញវត្ថុសាកល និងថាការរីកចម្រើនផ្នែកបច្ចេកវិទ្យា ពិសេសសេវាធនាគារចល័ត (Mobile Banking) បានរួមចំណែកដល់ការរីកចំរើននៃសេដ្ឋកិច្ច។ លោកក៏បានជម្រាបជូនអំពីផលប័ត្រជាច្រើនរបស់ វីង ដែលរួមបញ្ចូលទាំងផលប័ត្រហិរញ្ញវត្ថុ រហូតដល់ភស្តុភារ និងពាណិជ្ជកម្មតាមប្រព័ន្ធអ៊ីនធើណិត។
លោក Rajan បានលើកឡើងពីតួនាទីរបស់ វីង ក្នុងអំឡុងពេលនៃវិបត្តិជំងឺកូវីដ-១៩ ដោយក្រុមហ៊ុនបានប្រើបណ្តាញភ្នាក់ងារវីងចំនួន១១,០០០ទូទាំងប្រទេស ដើម្បីសម្រួលដល់ប្រជាពលរដ្ឋ ពិសេសអ្នកនៅតំបន់ជនបទ ក្នុងការដកជំនួយសាច់ប្រាក់របស់រាជរដ្ឋាភិបាល និងធានាបានថា ជំនួយសាច់ប្រាក់ទាំងនោះបានទៅដល់ដៃពលរដ្ឋភ្លាមៗ។
ដោយឆ្លុះបញ្ចាំងការរីកចម្រើនរបស់ វីង ឯកឧត្តមរដ្ឋមន្ត្រីបានលើកទឹកចិត្តឱ្យក្រុមហ៊ុនបន្តអភិវឌ្ឍ និងនាំយកបច្ចេកវិទ្យាថ្មីៗបន្ថែមទៀត ជាពិសេសបច្ចេកវិទ្យាដែលគាំទ្រដល់សហគ្រាសធុនមីក្រូ តូច និងមធ្យមក្នុងស្រុក។
ឯកឧត្តមក៏បានជម្រាបជូនអំពីទិវាជាតិវិទ្យាសាស្ត្រ បច្ចេកវិទ្យា និងនវានុវត្តន៍ ដែលក្រសួងនឹងរៀបចំនៅថ្ងៃទី២៤-២៦ ខែមីនា ឆ្នាំ២០២៤ និងលើកឡើងថា ប្រធានបទឆ្នាំនេះគឺ «សហគ្រាសធុនតូច និងមធ្យមឆ្ពោះទៅ វិទ្យាសាស្ត្រ បច្ចេកវិទ្យា និងនវានុវត្តន៍» មានគោលដៅបំផុសចលនាឱ្យសហគ្រាសធុនតូច និងមធ្យម ស្វែងយល់ពីបច្ចេកវិទ្យា និងនវានុវត្តន៍ ដែលនឹងបង្កើនផលិតកម្ម និងលើកកម្ពស់ផលិតភាពសហគ្រាសរបស់ពួកគេ។
លោក Rajan បានបញ្ជាក់ចំណាប់អារម្មណ៍របស់ វីង ក្នុងការសហការជាមួយក្រសួង ដើម្បីបង្ហាញដំណោះស្រាយនវានុវត្តន៍ នៅក្នុងទិវាជាតិនាពេលខាងមុខនេះ ព្រមទាំងបង្ហាញពីការប្តេជ្ញាចិត្តរបស់ វីង ក្នុងការចូលរួមអភិវឌ្ឍផ្នែកបច្ចេកវិទ្យា និងលើកកម្ពស់កំណើនសេដ្ឋកិច្ចនៅកម្ពុជា។